有權有勢嘅人講句嘢都可以大聲過人，正如明星夠紅耍大牌都吹你唔脹。雖然上述兩種人，並唔係個個都有風駛盡隽，不過每個階層總有啲衰人，好似「強者」咁，就完全將自己大牌一面表露無遺。
外強中乾嘅強者最鍾意黐達官貴人，表面上做到好好先生咁，但同佢合作過嘅人大部份都唔係咁睇，聽過唔少人講，對強者都係有彈冇讚，聽得最多係強者對下面啲細嘅態度差，又句句附送粗口，咁大蝦細呢啲情況行行都有，又唔係啲乜特別，不過強者就被指蝦蝦霸霸之餘，仲要好黑心，恃強凌弱，做細嗰班人為求保住飯碗，都係敢怒不敢言。
聽某位劇組人員講親身經歷，曾經有幸同強者喺同一環境下合作，但就冇直接關係。有日開工，武指度咗一段動作戲要強者做，表面上冇人夠膽否定強者身手，勢估唔到強者竟然做唔到嗰套動作，大庭廣眾衰咗，惟有係賴地硬，倒轉頭怪責武指冇料唔識度動作，指定要對方親身示範一次，然後佢就同自己較親近嘅「手足」講咗句：「同我插爆佢對眼。」大佬落命令，兄弟即刻做嘢，結果係點？自己諗啦！
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。