【財經專題】「曾經有個男仔話，你哋唔好再逼我老婆去美容院，再逼佢去，我破產！」琥珀美容創辦人梁健恒（Alvin）訪問市民對本港美容院的睇法換來如此答案，更甚的是，十之八九都覺本港美容院形象負面。他歸納行內四大不良銷售手法，包括偷龍轉鳳、偷工減料、強迫消費、騎虎難下，指行家整臭一個牌頭便金蟬脫殼，改名重施故技。每次行內被揭醜聞，他就很快樂，黑心？他覺得去蕪存菁，有利於他這種開業至今未改過字號的美容院。由屯門街坊生意做到目前13間分店，今年更推出「至安心」美容計劃，讓客人試做30天先決定幫不幫襯，結果首月營業額跌三成，三成員工辭職。自討苦吃？他說是做好品牌。
梁健恒2013年與友人花60萬元起家，由屯門街坊美容小店做起，「我嘅經營理念叫『小步大走』，寧願快小步，唔會大步走。一間舖做得好，唔夠位，客人多，就喺附近開多一間，啲客就好自然轉移過去，好自然又儲到一班客，如是者，慢慢擴充。」
踢爆行業不良銷售手法
「行業充斥好多不良銷售手法，其中一個係『偷工減料』，即係個客買開嘢，到佢冇買，咪冇做足服務，例如減少時間；第二叫『偷龍轉鳳』，用緊嗰隻產品，第二次加咗另一啲嘢落去；第三，過程中一路話畀個客聽買乜買乜，但未必真係個客需要，亦未必真係個客負擔到；第四，聽過客人喺房除晒衫，就已經被人sell，甚至喺佢個袋攞張卡嚟碌。」
這些不良銷售手法猶如把整個行業攬炒，梁健恒認為，一切歸咎於大集團進入市場並作出很多不合理做法，「例如佢哋包薪人工離咗地，返工第一日咩都唔使（做）就已經保證月薪10萬。一個中五未畢業嘅女仔憑咩可以拎月薪10萬，憑嘅就係之後一個月你要跑數，每個客攞多啲啦，唔好畀佢走啦，困佢耐啲、傾耐啲啦，呢個就係惡性循環。」
他坦言：「旗下分店都可能會有呢啲問題，所以推出冷靜期，因為我冇可能管住幾百個同事，唔會知前線閂埋房門同個客講咩嘢。」推出24小時內退款措施後，「對客戶好，對員工未必好，結果出現辭職潮，走咗三成同事。」初期公司人手才十多人，花約三個月就補充了新血。
六年來小步走到目前13間分店，今年1月推更冷靜的「至安心」計劃，「新客嚟試完我嘅嘢，要離開，畀足30日你冷靜。」實施首四個月，回頭客僅一半，「一個月之間，生意少咗三成，員工少咗三成，雙重打擊。5月先做返應該有嘅生意……舒服返啲，人手增加返。」
政府今年初展開針對美容業及健身行業的強制性冷靜期公眾諮詢，不少美容業界反對。身兼國際美容健康發展常務委員會副主席的梁健恒表示，業界大部份人反對強制性、一刀切，因害群之馬只是小部份。如果實施強制性冷靜期，大部份美容院將面對銀行收緊現金流。但梁健恒認為，業界可設立約章，需要設立冷靜期，「好似我咁做咗咁多年相安無事，退款數字不斷下降。唔行冷靜期嘅，大家都明，你咪唔好幫襯囉。」
記者：陳家雄