星期一參加校友飯局，話題自不然慢慢就集中於時事，校友有藍有黃，好彩不損多年交情，不會割席嘅。對中國最有認識嘅博士C肯定咁講，北京唔會派解放軍出營，亦唔會派武警嚟，因為一出「核子彈選項」，中國之國際形象就會受重創，衰過1989年六四，需要另外三十年嚟修補。但從芬蘭化經驗嚟講，一個小城市在大國之旁（何況此大國更係宗主國），根本無可能起到飛腳，必須委屈求全，向宗主國輸送利益兼不作任何激怒國家嘅行動。講得坦白啲，就係香港識做聽話，中國一定唔捨得摧毀一個極為難得嘅國際金融中心。
相反地，北京要香港人聽話，換來井水不犯河水嘅話，北京就不要管得太緊，雙手伸得太長，容許香港進行雙普選，其實對中國根本無任何損失，因為香港即使係孫悟空，玉皇大帝就是住在北京中南海內，牢牢掌握香港防衛、外交，點會怕香港跳出五指山！西方點睇？倘香港有雙普選，包保美國國會唔會得閒到理香港事務，到時香港會更繁榮安定，對中國國際形象及實利，大有好處。
有人話李光耀生前嘲笑香港爭取民主選舉噃，藍絲經常不停廣傳李光耀回歸前在港大陸佑堂當面斥彭定康嘅影帶，當李光耀係神，一錘定音。讀過李光耀傳記幾遍嘅校友C話：「李光耀係徹頭徹尾超級現實主義者，佢唔係反對民主選舉，佢深知選舉可以操控，可以永保人民行動黨永久在新加坡掌權，一黨專政得來而又唔會得罪美國英國呢啲民主國家，明知佢獨裁都唔會砌佢。李光耀叫香港唔好搞民主，係因為佢知道北京唔喜歡而已。北京如有高人掌權話事，准香港搞新加坡式民主，香港必定大放異彩。」
道理就係咁講，不過中共或任何共產政權嘅大前提係監控與控制，否則政府唔安樂，今時今日要北京有思維突破，怕都幾難。
只是近日有人懸紅一百萬為香港尋找一條出路，綜合上述意見，寫成建議書，唔知可唔可以得到一百萬呢？騎騎！校友L話講多一個李光耀的故事，自傳裏，李光耀話有個華人在新加坡獨立之初，不停宣揚要用中文學中文，保護中文，李光耀嗤之以鼻，話最睇唔起嗰位先生，因為先生拼命宣揚中文，自己就送晒子孫去英國讀書受教育！今天香港與中國多的是呢類人，口說愛國，痛罵香港通識教育，而跟住送晒仔女去英國讀寄宿學校或往美國生仔拿美國護照，呢類人最好唔提李光耀個名字！