呢排愛國愛港陣營個個要做護旗手，唔講保護、尊重國旗，就不足以顯示自己愛國，對抗班侮辱國旗嘅示威者，所以唔少愛國愛港人士借慶祝中共建政70周年機會，點都要整色整水宣示吓支國旗，但一般酒會室內舉行，好難搞升旗儀式，香港友好協進會噚日就有計，一於嚟個播片升旗，幾百人睇住大銀幕條國旗片致敬，但好多網民見到就忍唔住笑。
友好協進會個酒會有林鄭月娥、外交部駐港特特派員公署特派員謝鋒、中央人民中聯辦主任王志民、同埋駐港部隊副政治委員陳亞丁出席，自然更要顯示對國旗尊重，不過好多網民喺電視見到佢哋成班人睇住大銀幕支國旗，個個好似睇真升旗禮咁，好多人忍唔住揶揄擦鞋使唔使擦到咁？電視日日播緊國歌同國旗宣傳片，唔知呢班人又有冇一見電視播國旗立即乜都唔做，致敬肅立呢？