台灣女星張鈞甯早前被爆同內地男星張翰領證結婚，事後男方工作人員澄清並冇此事。噚日有報道指張鈞甯原來早有新歡邱澤，邱澤之後回應台灣《蘋果新聞網》時大方認愛：「努力追求中，請大家給祝福。」
甜蜜夜會
張鈞甯同邱澤之前喺電影《八歲的爸爸》飾演夫妻，懷疑戲假情真，其後被爆同遊日本，再一齊返台灣。日前張鈞甯趁去巴黎時裝周前，把握時間去邱澤屋企相聚，再去遊車河。邱澤被影到開車載住張鈞甯出門，二人喺車上有講有笑，表現甜蜜。賽車手出身嘅邱澤後來飛車撇甩記者，張鈞甯午夜時分返屋企，疑似為咗掩護戀情，叫助手扮到好似自己陪伴。 「澤甯戀」曝光後，邱澤表現大方，首度認愛：「努力追求中，請大家給祝福。」
張鈞甯出道後傳過幾段緋聞，佢曾經同趙又廷交往三年，可惜佢唔肯公開認愛，戀情最後無疾而終。近來喺內地發展嘅張鈞甯，除咗同張翰傳緋聞，又有傳佢同IT公司CEO黃凱偉相戀，可惜戀情因聚少離多，維持兩年宣佈分手，男方去年被爆同主播蔡宜靜喺峇里閃婚。
張鈞甯大前年被影到同前考試院長關中女婿林哲樂一齊行超市，仲被男方輕輕攬腰，不過張鈞甯都係唔願認愛，堅稱「只是朋友」。有傳去年9月，林哲樂被張鈞甯發現佢同其他女人傳露骨訊息，男方雖然話對方只係炮友，但最終都係分手收場。
撰文：馮仁昭