曾志豪由反高鐵到反送中，均以邊行邊採訪形式進行，於6.12包圍立法會當日，曾志豪首次到場︰「我嗰次係想去睇吓，點知去到個個如臨大敵，之後開始射催淚彈，事前冇諗過咁大件事，第一次食催淚彈就喺嗰度。」隨着事態發展，曾志豪由單罐的豬嘴防煙面罩，到今時今日的專業型，他的心態也隨之改變，他說︰「我行動上仲係和理非，因為真係冇膽量衝出去，但心態上已經轉咗好多，無論示威者、抗爭人士用乜嘢手段，有所謂幾大嘅破壞，我都冇底線咁接受，會好願意去理解同情佢哋。」
7.21成分水嶺
曾志豪自嘲本是個無可救藥的左膠，早期圍警總時，他對示威者行為看不過眼︰「6月嘅時候佢哋叫口號，我係叫唔出，甚至我會覺得唔適當。嗰時開始用狗糧玩警察，又會鬧佢哋毅進仔，又會話佢哋『黑警』，當時嘅我係左膠到會諗，唔好咁啦，點解話人哋係狗，用狗糧玩人箒。」直到7.21恐襲後，曾志豪的底線迅速消失︰「元朗警署落閘嗰一刻，我道德嘅閘就開咗，直情冇底線放出嚟。」逆權運動發展至今，曾志豪覺得令香港人增加歸屬感︰「睇到《願榮光歸香港》管弦樂合唱團版本，當中間白煙升起模仿催淚彈，嗰一刻好感動，提醒我個個人都有為呢個城市流眼淚，好慶幸自己有流過眼淚。」