大家仲記得早排大陸帝吧出征香港打反送中網戰，結果出師未捷身先捐，俾香港網軍起底兼幫佢哋報名捐器官，帝吧網軍成為恥笑對象，估唔到捐器官風氣吹到香港，經民聯立法會議員梁美芬噚日喺fb發帖，話自己個人資料被公開，仲有人拎佢嘅資料去網上登記捐贈器官。原本梁美芬公開件事，梗係想人為佢呢個受害者抱不平，但點知今次揭發佢原來一直冇參與器官捐贈計劃，結果引嚟好多網民鬧佢作為建制派，竟然冇帶頭響應政府呼籲？
話說梁美芬噚日喺fb發帖，話收到熱心市民通知，有人係Telegram群組公開了佢嘅個人資料，包括身份證號碼、電話號碼同住址，仲有人冒用佢嘅身份喺網上登記器官捐贈，佢仲話6月時已經有網民惡意公開所有建制派立法會議員個人資料，佢近期亦試過深夜收滋擾電話，因唔想加重警方工作，所以冇報警，但今次有人冒用佢個人資料捐器官，佢覺得不能再啞忍，亦怕有人用佢個人資料作不法用途，所以決定報警。
「有冇諗過排隊輪候嘅港人」
原本梁美芬話晒係受害人，點都應該同情佢，但好多人留言話佢，原來梁美芬一直冇參與器官捐贈計劃，政府成日呼籲市民簽器官捐贈卡，梁美芬作為建制派，送中、DQ議員就支持政府，政府叫捐贈器官又唔支持？有網民留言質問佢點解一直唔參與器官捐贈？做議員唔係應該帶頭做良好示範咩？教育市民去幫多啲有需要嘅人㗎咩？反問佢有冇諗過排隊輪候器官嘅香港人？
李八方