林奠有話兒，呀呀呀呀呀，今日灣仔，除了肥媽，生人勿近。黨鐵配合暴警，老奉飛站落閘，唔止一個灣仔站，由灣仔葵芳深水埗，關站鏈，鏈到將軍澳大埔天水圍，輕舟已過不停關！林奠親她的入閘機，市民自己搵路走，遊行真係有用嘅，起碼練好了腳骨，幫爆缸骨折斷筋的兄弟，行落去。
喝極唔肯講人話的林奠去伊館，其實唔係適切地點，識做騷的公關，梗係叫佢去太子站啦！B出口！你懂的，當下的林奠政權，已經唔係雞同鴨講，而係人與神異界的通靈溝通！與會者若果問林奠點收拾爛攤子，我建議你去問米，神婆，老點極都老實過佢。
從鬧人「全部廢話」到自high對話「正式啟動」，林奠部署做紅臉，把人當做黃色物體踢的黑警喪屍，當然淪為做醜人。如果今晚對話攞到分，按林奠性格，一定食住上，踢走散發三個月冤臭味的包袱，草「管」人命喎，割都割唔切！
年輕人今晚應該發夢嗎？我強烈建議，食完叉雞飯就返屋企，上床前用尼采金句，提醒極需安撫的身心：「與怪物戰鬥的人，小心不能讓自己也成為怪物。當你凝視深淵時，深淵也在凝視你。」