10月嘅國際賽期,港足下個月除咗作客伊拉克踢世盃外,本來仲有主場友賽馬來西亞同港澳埠際賽,不過呢場兩場波分別已撤回同暫緩。
為咗備戰嚟緊嘅世盃外賽事,港足特別喺作客伊拉克後嘅空檔,約咗馬來西亞喺10月15號嚟大球場拍跳,星期一已經開始賣飛。點知噚日馬來西亞足協通知香港足總,話派唔到隊嚟香港喎,香港足總試過協調,但都係拆唔掂,呢場波要撤回,足總遲啲會公佈退款安排。
另外,今年港澳埠際賽輪到香港作東道主,原定下個月12號踢。不過,澳門足總向香港足總提出,話10月派唔到隊過嚟,雙方需要再定新賽期。消息人士話,澳門最近忙於「雙慶」,即係10月1日嘅中華人民共和國70周年國慶,同埋12月20日嘅澳門回歸中國20周年慶典,所以籌備唔到派隊嚟香港比賽。
兩場受影響嘅波,唔知關唔關反送中事,總之下個月香港就得一場作客波,要撐港足,就要去伊拉克喇。