否決！富力冇得代表香港……住！嚟自中國廣州嘅港超聯球會富力，想申請成為正式會員，足總喺星期二嘅特別大會上面表決，富力雄心壯志，點知大比數否決。香港取得階段性勝利，但場仗未完，因為富力隨時可以再申請！
雄心萬丈欲戰亞洲賽
富力由2016/17球季起參加港超聯，當時佢哋必須要派出三個香港球員落場，其餘只可以係中國球員，唔可以用外援。規矩每季都改，慢慢變成富力可以用外援，香港球員亦越嚟越多，今季嘅外援名額變到同其他本地球會一樣，但係主場都仲維持喺中國廣州嘅燕子崗體育場。富力慢慢喬裝成香港球會，仲每年大灑金錢組軍，你知我知，連單眼佬都知佢想點啦，就係攞個聯賽冠軍，代表香港出去踢亞洲賽。
不過，冠軍就未攞到，所以富力嘅亞洲賽資格從來都唔存在，但富力一直都積極解決緊會籍問題，想盡快攞完冠軍去踢亞冠盃嘛！喺星期二嘅足總特別會員大會，就表決富力可唔可以成為足總入面「有投票權會員」，因為要過到呢關，富力呢個牌頭，先有機會經香港衝出亞洲。
16票反對得5票贊成
以為志在必得咩？當晚總共有22支有投票權嘅球會派代表出席，最後得五票贊成富力轉為「有投票權會員」，一票棄權，包括傑志、香港飛馬同冠忠南區在內，總共有16間球會投反對票。當中代表甲組球會沙田出席大會嘅沙田區前議員陳漢英仲話：「睇唔出富力同中國嘅廣州富力有咩唔同，廣州富力有中國會籍，如果兩隊富力一齊踢亞洲賽，會唔會係笑話呢？唔知亞洲足協點睇。」
亞洲足協點睇就未知，但今次富力大比數被否決，球迷就拍爛手掌。不過，革命尚未成功，因為足總冇限制球會嘅申請次數，富力隨時都可以再次申請，所以今次只是香港嘅階段性勝利咋！