真心愛港市民過去三個幾月瞓身抗爭，連以前港豬最關心嘅新iPhone 11開售都搞到冇乜人理，更加唔好講爭崩頭炒機，點知造就咗「人形物體」入貨。有POPO返咗去強國社交網絡地盤微博，晒自己用加班費買咗iPhone 11，仲話「多謝示威者」，但就換來內地網民潑冷水，溫馨提示佢應該要用華為先真係愛國。
曾斥政治鬧劇逼佢「割蔗」
微博網名叫「叫我小聰得啦」嘅香港POPO，佢部新iPhone 11一到手就奔向大灣區，影相去微博晒命，留言仲針對抗爭運動，話示威者嘅逼迫只會令佢更「堅定不倔（屈）」。八方睇埋佢其他帖文，佢都幾經常就香港問題表態，例如上星期日就話香港最近嘅政治鬧劇，令佢要面對同學同朋友「割蔗（席）」，雖然灰心失意，但微博網友畀佢嘅雪中送炭就成為佢「取暖的愧（瑰）寶」喎。
呢位POPO學足出席記招班大sir咁唔識字，八方耳邊即時有惡搞肥媽金曲響起：「……警……又唔讀書！」其實堂堂警察月入幾萬，但買部新iPhone要靠OT錢，難怪香港網民瘋狂恥笑，佢仲淪落到要去微博搵國內同胞施捨同情圍爐取暖，更加反映香港警察已經變過街老鼠，喺香港真係冇晒朋友啦。