有人話，香港已踏入融資寒冬，初創好難籌錢，因為連VC都無錢，我會話係一件好事。因為呢段時間，初創會逼住去獲利。
我曾見證過身邊不少創辦人朋友，佢哋都曾經擁有員工至少幾十甚至上百人，擁有過萬呎辦公室，桌球枱遊戲機健身室都一應俱全，將辦公室裝扮成皇宮一樣，過吓做皇帝嘅快感，說穿都係滿足自己嘅fantasy。之不過，有少數朋友，沉船之後都好快覺醒，可能悟性高，可能錢燒太快，佢哋覺醒知道呢啲開心係一時之間，唔可以沉淪落去。佢哋好快就狠下決心downsize，唔要咁多員工，唔要浮誇嘅office。我粗略去歸納，佢地多數係有家室、有佢地好愛嘅屋企人。
當然，作為一個推崇自由的人，我不會反對成年人追逐快樂，甚至會承認，作為一個創辦人，募資幾乎是一種不能避免的人性：你付出一點點自由，換取一大疊鈔票，可以滿足與生俱來各種各樣的慾望，邊個唔想？
有啲嘢試吓無壞，如果籌一兩輪錢，你仲有條件buy back，或者唔give up太多股份同經營自由，即管去滿足下自己嘅幻想囉。
問題係，籌錢同好多會上癮嘅事情，例如食煙飲酒一樣，係會越踩越深，因為融資到越後期，你失去嘅自由越多，你只可以繼續行落去，一係繼續燒繼續籌，直到exit離場為止，一係搞唔掂要執笠收場。
籌到C輪D輪甚至更後期嘅朋友，我唔會再問佢哋初心係咩，因為問都冇用，佢哋已經自己洗晒腦，只係想盡辦法離場，唔會想留喺不斷燒錢籌錢嘅無間地獄。呢啲苦痛掙扎，佢哋梗係唔會公開咁講，但你喺旁邊，嗰份無奈梗係會feel到。
尹思哲
http://linkedin.com/in/wanszezit