【本報訊】近期多名組織示威人士均被襲擊，民陣召集人岑子杰與友人8月下旬遇襲，警方其後拘捕兩人。岑指據知事發一周後就拘捕疑犯，「感覺都有認真辦案同仔細調查」，但就不知道疑犯背景，亦未有提堂資料。他遇襲後已提高警惕，「會盡量唔好行巷仔，去啲有CCTV（閉路電視）嘅地方」，早前外出亦有帶備行山杖，但認為始終防不勝防，「有心人裝冇心人，其實避唔到」。
憂私了氣氛更濃烈
對於再有民主派人士受襲，岑指自己與鄺同樣是「和理非深入骨髓」之人，假如和理非者都遇襲，變相是鼓勵示威者私了，「當有藍絲加入，而警方又選擇性執法，黃絲惟有自衞，過程中同藍絲嘅衝突越嚟越升級，然後就變成所謂嘅私了」。
岑不擔心這些襲擊事件會令港人對示威運動卻步，「如果覺得香港人會因為咁而驚，其實好唔貼近2019年嘅政治氣氛……𠵱家見到香港發生咗咁多冇諗過會發生嘅事，但大家都冇卻步過」。他反擔心會令私了氣氛更濃烈，「希望親建制嘅人諗一諗，其實用呢種高壓方式製造混亂去解決香港嘅問題，對呢個運動於事無補，對成個香港都於事無補」。
北區水貨關注組召集人「金金大師」梁金成上月中旬亦在沙田第一城被數名男子伏擊，以藤條類的物體打傷，施襲者更警告他不要再「搞事」。以他所知，警方現仍未就其案件拘捕任何人，「其實除咗岑子杰嗰單，有邊次襲擊事件有拉到人嘅箒？」
為防再次遇襲，梁外出時會多留意有否被跟蹤，「唔會透露咁多行蹤俾人知」。對於鄺受襲，他形容鄺在反送中示威活動中一直保持和平理性，「佢唔係衝擊嗰班，又冇挑釁過警方，只係好希望政府回應我哋嗰五大訴求……連咁嘅人都受襲，係咪有班人專登同林鄭叫大家『冷靜啲』所吹嘅風對着幹？」
警方指岑子杰與友人受襲一案，9月上旬拘捕三名15至44歲中國籍男子，其中兩人分別被控串謀襲擊致造成身體傷害及其他交通條例，分別10月18日及11月5日在九龍城裁判法院再提堂。另一人獲准保釋候查，警方仍繼續追緝兩名在逃人士。梁金成一案未有人被捕；鍾健平案則以事主未有錄取口供為由，同樣未有人被捕。
■記者盧珮瑤