每季球季結束，不少球員都面對掛靴後去路問題。掛靴，從來困擾球員，無論球員生涯多輝煌，脫下職業球衣便要面對在社會生存的問題。90年代退役的前港隊門將陳慶榮為生計，退役後轉任的士司機，而冠忠南區的前港隊守衞沈國輝今季結束18年職業球員生涯，獲球會高層安排擔任球隊助教；其弟沈國強則較早掛靴，原先想轉到其他行業發展，只是無法適應及投入新工作，最終還是回到球場，擔任全職教練。
記者：曾雁平
攝影：禤家民、曾雁平
陳慶榮（58歲/前港隊門將/1996年掛靴/現職的士司機/丙組荃灣教練）
在95/96球季，陳慶榮為好易通邀請隊踢罷對英格蘭的表演賽便掛靴，開始當的士司機及教練。這位前港隊門將說：「好早已考的士牌，初出道喺84/85球季加盟東方，當時初踢甲組條件唔太好，得幾千蚊月薪，唔夠維持生活，唔使操練就揸的士，揸咗年幾。轉會愉園後條件好咗，少咗兼職揸的士，但有時間都會開工幫補收入。」
香港足球從來沒有太多保障，尤其陳慶榮那年代，不像現在較多足球學校，坊間有很多足球班，球員掛靴後便可執教。他說：「以前退役就失業，冇鋪定後路就會好徬徨。自己過30歲開始受傷患困擾，知道踢唔得幾耐，要到社會捱世界，有家庭負擔就要面對現實。供養小朋友，又要供樓，壓力有，但教波同揸車都係自己鍾意，以呢兩樣作為職業唔算太困難，如成日懷念當年，要到社會做嘢就難啦！」
球員轉型初期難免有困難，陳慶榮說：「球員生活自由啲，當打時收入好過一般打工仔，而自己轉型算快，可能同鍾意揸車有關，唔覺得做的士司機辛苦。我成日同家陣嘅球員講，千祈唔好諗以前，對轉型冇幫助，完咗球員生涯就係完咗。家陣教小朋友守龍門，成日同佢哋講要面對將來，球員生涯代表港隊，退役後都唔代表啲咩，如果成日諗住以往代表香港就有光環，唔會有動力投身社會，始終離開球員身份去到另一個階段就係重新嚟過。」
他更指如有客人坐其駕的的士，也不會因此覺得很光榮，其責任就是將客人送到目的地，又指現在比起當年已好很多，政府有計劃幫助退役運動員轉職，港超聯球會亦樂於聘請退役球員。
沈國輝（35歲/前港隊守衞/2019年掛靴/冠忠南區助教/青年軍教練）
「我覺得我係幸運兒，掛靴即獲球會安排改任助教，好感謝球會高層。」17歲考入愉園青年軍，上季結束18年職業足球生涯的沈國輝說：「踢波初初已經諗幾時掛靴，到35歲係時候。其實可以再踢多季，但邊線防守球員要速度同轉身快，我30歲開始已覺身體機能減慢，亦開始思考退役後去路，當時冇諗得太遠，未有仔細諗退役後留喺球圈定搵份工，但有留意身邊前輩退休後去向。」當時他左思右想，最後還是覺得在球圈多年，球圈或體育方面工作較適合自己，他說：「出道頭幾年已開始喺青年會客串教青少年足球班，初初未諗住考牌，單靠踢波經驗教小朋友，之後開始由D級教練慢慢考上去，又不斷去學，𠵱家考咗B牌，遲啲會考埋A牌。」
沈國輝承認掛靴前很困擾，心想如繼續踢會否仍能任球隊常規正選，並指自己不想當後備，但亦要接受年紀大的事實。他說：「上季已同細黃生（黃焯添）溝通過，覺得踢到差唔多35歲要考慮退落嚟，去到2至3月就決定掛靴。其實決定前仲係十五十六，始終唔捨得，踢完足總盃決賽至今仍未覺球員生涯已完，要慢慢接受，諗喺教練工作上做啲咩。」生活上雖沒太大轉變，但他承認球員身份較簡單，現在要思考訓練上的安排及協助主教練︰「每個球員際遇唔同，自己好幸運，感謝球會畀球員有份尊重，有歡送，又安排助教工作，效力南區四季，只有感激。有機會喺職業隊教波係好大嘅挑戰，會擔心自己做得唔夠好。」
沈國強（34歲/前港隊前鋒/2017年掛靴/曾轉行但不成功/現任全職教練）
「踢傑志最後一季狀態有啲跌，當時想掛靴就試吓轉工；職業運動員遲早要退役，學我大佬所講，踢波係後生仔嘅世界，唔想踢到33歲仲勉強踢落去，而且踢前鋒體能跌得快，狀態差就更難同外援爭位。遲早都要掛靴，寧願早啲轉型，有多啲時間適應。」沈國輝胞弟沈國強初掛靴已想轉型，但試過其他工作後才知道教練工作最適合自己：「決定掛靴後休息2、3個月就開始搵工，首選做政府工但考唔到，就試吓投身金融業。」這情況大概維持一年，其間前隊友李圳業介紹他到利物浦國際足球學校（香港）兼職當教練。
「金融業同足球完全唔同，要着西裝返工，做一般文職工作，捱咗半年，好努力做但點都差啲，亦投入唔到。原先想試試其他工作，但可能因為自己適應較慢，工作時間亦冇踢波咁彈性。」沈國強覺得足球工作較得心應手，在金融業完全想不到解決方法，但在足球上則截然不同。
「喺香港做運動員始終要擔心退役後出路，好彩自己放低足球員身份唔算太難，睇自己心態。」他指做人要向前看，偶爾想起以往代表香港出賽可以，但不可經常懷緬。「當然唔係職業球員先做到教練，但始終有優勢，知道球場上遇到咩情況應該點處理。享受𠵱家嘅工作，就算要返辦公室，但工時較彈性，可以邊學邊做，開心過做金融。」
他補充現只是起步，即使5人足球與11人足球的教法與踢法都不同，將來也會繼續進修。雖然已退役兩季，但沈國輝有時在街上會碰到些球迷上前問候，未被完全遺忘，也有點欣慰。
