【本報訊】「爸爸，你好耐未抱過我，你抱吓我先啦！」患上急性肝衰竭瀕臨死亡邊緣的20歲少女張寶琪，四日前突然奇蹟地蘇醒過來，她第一句話便是對爸爸撒嬌要擁抱；昨日除了能與親友同學談話及吃東西，甚至可以落床及洗澡。張父昨憶述當日堅持不讓醫護人員拔除女兒的維生儀器，最後救回女兒一命，講述女兒連日來康復進展時，展示久違了的笑容。
記者：劉漢權 馮智敏
張父說，寶琪昏迷的日子裏，同學、朋友都來到醫院，在她面前說開心事，又播放她愛聽的英文歌，「佢雖然昏迷，但所有人講嘅嘢，佢都聽到晒。其實佢有反應，抓佢腳板底會郁。」雖然「醫生已經吹雞，（叫我們）有心理準備辦理後事，見佢（寶琪）兩行眼淚自己流出嚟。」張父仍抱着不放棄態度，「判咗佢咁樣，話全部儀器要拔走，我當時指住啲人員講，寶琪𠵱家仲有氣，你哋全部唔好郁，佢好正常，血壓、心跳、呼吸全部正常，你哋唔好拔走啲喉！」
可進食飯餐 落床洗澡
事實證明張父的堅持是對的，「有個腦科醫生，佢真係好好嘢，睇（寶琪）隻眼有光，敲佢腳板底有反應。ICU（深切治療部）醫生好落力，睇到寶琪有反應，醫生都眼有淚光。」結果，家人永不放棄的精神，令寶琪成就了生命的奇蹟。「希望佢快啲出院，但係佢應該要留喺度一段時間，要慢慢恢復機能。」張父流露絲絲微笑，盡顯對愛女之情切。
「我𠵱家先識笑！」面對愛女病況，經歷「失而復得」的跌宕，他坦言現在心情稍為「鬆少少」。談到愛女蘇醒後的進展，張父說：「佢𠵱家叻到三日來每朝7點打電話畀我，佢意志力強，發揮到自己本能。食嘢、飲嘢、講到嘢，佢個人開朗咗好多。」
他又說前晚寶琪已可以進食飯餐，與到訪的同學交談，昨日更可以落床及洗澡。張父說：「仲要食藥，肝功能未過正式危險期，現在只差黃疸指數，正慢慢降低，可能都要三星期。」
寶琪本月初作嘔及頭暈，入院後驗出肝臟出現嚴重衰竭，獲轉介到瑪麗醫院等候換肝，並排在O型屍肝輪候名冊首位。其間她出現腦水腫等問題，不適合換肝，醫生一度判斷她將因肝衰竭死亡。