改編自同名遊戲嘅台灣電影《返校》，喺台灣好收得，由於內容涉及台灣處於戒嚴時期，學校充斥白色恐怖，讀禁書嘅人被判叛國罪，言論自由受監控，同今日香港情況好似。早前有消息話《返校》會喺10月17日上映，不過個page已被刪除，令人猜測因政治原因冇得上映，但近日又有消息話上映有期，但好多網民睇完個上映日期，又再質疑背後係咪有政治考慮。
電影專頁：檔期有變
《返校》台灣票房十分唔錯，首日全台票房突破1,800萬元新台幣（約454萬港元），日前仲破埋台灣單日票房超過2,750萬元新台幣（約695萬港元），早排facebook page「返校 Detention 電影——香港」，一度貼上香港版預告及公佈電影將在下月17日上映，不過該page已被刪除，當時有人猜測同故事以1962年台灣為背景，涉及台灣戒嚴同學校充斥白色恐怖呢啲政治敏感內容有關。
不過噚日fb專頁「返校 Detention 電影——香港」再次出現，更出po指：「要大家久等唔好意思！知道大家都對《返校》好期待，之前暫時收起係因為檔期有變，𠵱家重開啦！《返校》將會係12月5日同香港觀眾見面，希望大家到時要多多捧場！」不少網民對該片重生感興奮，但亦有網民發現，12月剛好完咗區議會選舉，難免令人猜測，係咪有人擔心11月宣傳套戲，可能會影響11月嘅區選，所以要套戲遲到12月先上映？
李八方