【黑鏡線索】
上次提到，中史解毒，其中一個要認清嘅不方便真相，係英國屢次喺清帝國嘅荒島同爛灘上，建立國際級文明城市，但冇任何迹象顯示，清帝國或往後嘅中國政權，有任何可能，做得到同樣嘅事情。所謂「英國人做得到的，中國人必定做得到」，完全係膠吹。
有人問，只不過有香港同上海呢兩個例子啫，樣本咁細，作唔作得準呀？
退後一步睇，晚清同民國，總共出現過27個租界，先撇除租定割嘅問題，香港只係其中一個。而係冇一刻，冇一刻，你會搵到一個租界以外嘅清國或中國城市，係文明過任何一個租界。點量度？好簡單，你睇當時有能力揀嘅人，用腳投票揀住邊度，邊度咪文明囉。正如愛國明星仆去美國生仔，香港高官送仔女讀國際學校一樣。口講冇用，身體最誠實。
例如，民國總統黎元洪，自己喺北京都覺得危險，索性搬遷中央政府。搬去邊？搬去天津英國租界！孫中山，國父級，住邊？住上海法國租界西式別墅。張愛玲，除咗住過香港，仲住過天津租界同上海租界。民族主義大作家魯迅住邊？上海日本租界。係，莫講話英國法國，連日本人管嘅租界，都比租界以外嘅地方，受追捧好多。所以，當中文明差異之大，無可置疑。黨爭只係枝末，清帝國、軍閥、列寧化嘅國民黨、同共產黨等等，都只不過係五十步笑一百步，最重要嘅分界，係租界內外。
由清帝國玩完之後，中國每一個當權者，都要面對嘅問題係，點樣處理租界？
租界區隔，輸入西方文明秩序，成為文明避風塘，令眾人嚮往。問題係，晚清開始，梁啟超等人，創造咗後來佢自己想切割都切唔到嘅「中華民族神話」，一時間，民族主義高速傳染，變成宗教真理。所以租界就有兩個問題。第一，既然中華民族咁偉大，點可以俾外國勢力管治部份國土？第二，明明中華民族咁偉大，租界點可以管得咁好，令人趨之若鶩？個故事加唔埋，穿晒崩，令大家好尷尬，所以領導人，係有好大壓力，要「撥亂反正」。
換言之，呢個係揀文明世界，定係民族主義嘅選擇。蔣介石掌權時點揀？1927佢帶領北伐，其中一個主要旗號，正正係反帝國主義同收回租界。隨住北伐推進，二十年代尾開始，漢口、九江、天津、威海衛等租界逐一「收回」，租界由區隔變做融合。
民族主義盲點 無視文明輸入
到咗二次大戰後期，英美要拉攏中國，對抗日本，於是願意將所有以前嘅租界條約，用張新約，一筆勾銷。有趣嘅係，當中嘅「中英新約」，英國完全唔提移交香港，淨係唔提香港。咁蔣當然嬲到震，話唔交出香港，就唔使旨意佢會簽。雙方爭持不下，後來幕僚苦勸，蔣先死死地氣肯簽。如果唔係，香港早就喺呢個條約裏面，同上海等一併移交。
好喇，打完仗，中國係戰勝國，蔣奪港之心不死，又提出要英國交出香港，起初得到美國支持，但英國同屬戰勝國，唔肯交出，最後美國都係支持英國，香港又避過一劫，令人抹一把汗。幾年之後，蔣連中國大陸政權都冇埋，避走台灣。
蔣多番搶奪香港，如果是旦一次成功，香港就會同其他「收回」嘅租界命運一樣。民族主義者最大嘅盲點，係為咗迎合虛幻嘅神話，無視西方文明輸入秩序嘅重要，而自斷秩序輸入嘅結果，就只得一個。上海、漢口、九江、天津、威海衛等地，喺偉大民族出返口烏氣之後，一雪前恥站起來之後，有邊一個繼續發光發熱？有邊一個繼續係自由文明世界一分子？邊一個成為令眾人嚮往嘅逃難之地？結果原本住喺租界嘅人，搬嚟仲係租界嘅香港。一次又一次，蔣政權只有能力收回，無能力管理。所以，喺捍衞香港國際地位，捍衞中港區隔嚟講，蔣嘅分數，如果唔畀負數，係零分。
中港區隔 毛澤東值一百分
相比起蔣對租界嘅一國一制，毛主席嘅兩國兩制，就更顯得難能可貴。毛當政時代，民族主義依然高漲，軍事實力上更強，可想而知，搶奪香港嘅壓力肯定更大。但毛經過韓戰，靠香港突破聯合國禁運之後，一直頂住民族主義壓力，忍住冇出手，呢個係香港奇蹟嘅另一個「積極不干預」，比較少人提，但可能更重要。毛嘅不作為，成就毫無管治成本、只賺不賠但唔宣之於口嘅「兩國兩制」，先唔講毛治中國有幾不堪，單純喺捍衞中港區隔嘅實際效果嚟講，毛值一百分。甚至有理由相信，如果英國早多幾年，搵毛或短暫繼任人華國鋒傾續約，未必傾唔成。
可惜英國遇上嘅，係新上任嘅鄧總設計師。佢嘅處理，係左右逢源。既想要民族勝利，又想低管治成本咁保持香港嘅利用價值去套戥，於是就一國，但兩制，鄧好清楚，香港從一開始，就係自由文明世界模式嘅產物，經歷英國治下達一百幾十年，六七代人，係除咗葡治澳門以外，芸芸中國租界之中時間最長。一個自由文明深入骨髓嘅國際城市，需要用返相應嘅制度管治，否則偷雞唔到蝕渣米。
淘寶版一國兩制 走樣攬炒
所以鄧設計一國兩制嚟區隔中港，以雙普選保障港人治港，高度自治，其餘事情五十年不變，之後再算。理論邏輯完全冇問題，但繼任人嘅實際操作，同原先個設計有出入，整個淘寶版一國兩制，將毛鄧嘅中港區隔，一百八十度改成中港融合，咁就出事。
特首之位，幫助中國領導人準確判斷香港形勢，落實真一國兩制，確保不走樣不變形，責無旁貸。如果特首錯誤引導中國領導人，造成誤判，必然做成真攬炒。大概冇人會否認嘅客觀事實係，到咗今日，喺國際形勢對中國最唔方便之際，香港嘅管治成本，已經升高到不可能維持嘅水平，為中共添煩添亂。而呢個入亂過程當中，689同777嘅角色同責任，點樣令本來就係A貨嘅一國兩制，進一步走樣變形，引發攬炒，必會被深入探究，無論點樣賴顏色革命外國勢力李氏力場，都無可能洗白，也必會寫入史冊。
撰文：宋漢生