警察係反送中運動期間執法，究竟有幾濫權濫暴，怕且唔使八方多寫，否則寫幾萬字都寫唔完，只要睇吓前線差人落到地區，俾街坊追住鬧、笑佢哋係毅進仔，就知前線班差人係乜嘢水平、有幾受街坊「歡迎」。低級警員俾市民笑，其實着白衫高級警員亦唔見得水平有幾高，特別係香港N年前已推行九年免費教育，膊頭有花嘅高級警務人員，竟然連小學生都識嘅中文都唔識讀，真係低水平過毅進仔。
「草『管』乘客生命」
話說噚日警方例行記者會上，警察公共關係科總警司謝振中指示威者行為危害乘客安危，佢就講「草『管』乘客生命」 ，八方聽到呆咗，「草菅人命」就知，「草『管』人命」又係乜？唔通謝sir平日管開人有條路，將「菅（粵音：奸）」讀成「管」？
「草『管』乘客生命」生命未夠爆，有組織罪案及三合會調查科高級警司李桂華，佢喺記者會話有示威人士犯「『悔』辱國旗」罪行，八方梗知香港有《國旗及國徽條例》，侮辱國旗違法八方都知，法例寫明「侮辱國旗」一經定罪，違法者可被判罰款同最高三年監禁，但「悔」辱國旗判幾重刑？成條《國旗及國徽條例》好似冇寫「悔」辱國旗罪，怕且除咗講呢條罪嘅李sir自己或者知之外，律師、律政司、甚至連法官都答唔到「悔」辱國旗可以點告、最高刑罰有幾重。
另外，李sir仲似乎仍未學識保存證物嘅重要性，繼早前有克警用廿秒即場示範所謂「高能量雷射槍」嘅殺傷力，被指涉嫌干擾證物，李sir可能為免前線同事面對指控受壓，先決定以身作則，即場徒手示範打開改裝長遮展示證物，以穩軍心。
李八方