香港先生鄭健樂（Rocky）過往在劇集中總是騷肌多過晒演技，局限了演出機會，賺到的騷錢很有限。Rocky大呻試過一個月的收入僅得四位數字，要養妻活兒當然不夠，他坦言太太有微言，最終要面對現實，全職做回老本行健身教練，有多餘時間才拍劇過戲癮。
現年52歲的鄭健樂於2005年當選香港先生「健力組」冠軍後加入無綫，2010年解約離開，兩年後重返公司。畢竟花無百日紅，為生活必須要面對現實，年過半百、依然操得好弗的他，想通了不再追夢，把重心放回私人健身教練上，密密接客養家。跟圈外太太育有兩子的他，一家之主的擔子不輕，若然不切實際做紙上明星，對家人來說是不負責任。
拍劇唔穩定
Rocky日前在銅鑼灣接受本報專訪，他親身示範TRX和戰鬥繩，之後更大談新動向：「最近做返老本行私人健身教練，其實我加入TVB都有教，可能拍嘢忙，教少啲，𠵱家full time去教，始終我興趣係教健身，我有超過30年教健身經驗，一路冇擺低過。拍劇通告時間唔穩定，好多時要等好長時間，又有時over run，有時連續七日，兩星期、四星期開工都有，預知唔到，通告比較亂，難全職教健身。」Rocky被分派都是閒角，騷錢自然不多，他明知藝人不賺錢都肯留低，為的想維持知名度：「做藝人搵幾多睇自己level，有人可能搵好多錢，有人搵一般或搵少啲，我就唔穩定，如果劇接劇比較好啲，我試過最差嗰個月收入得四位數。」
先使未來錢
Rocky坦言要太太幫忙支持：「公一份，婆一份，自己仲要就住使，甚至動用積蓄，兩個小朋友返學都要用錢，一定唔會好似冇小朋友嗰時咁鬆動，𠵱家我乜都諗兩個仔先。」入不敷支當年只能彈性給太太家用，他內疚說：「拎得幾多得幾多，我最窮時銀包得幾百蚊，好彩𠵱家有信用卡同八達通，可以先使未來錢。」太太可曾投訴，不要再追夢？Rocky說：「佢明白嘅，呻一、兩句梗係有，呢啲人之常情，我當然唔好意思，對屋企人係有少少內疚，希望好日子同好運快啲嚟，多工開好番啲，我平日會積穀防飢，儲定錢畀兩個仔，好天搵埋落雨柴，娛樂圈你唔知自己工作量，可能好忙，亦可能好靜，呢行係咁。」
現全職做私人教練的Rocky，學生數量及工時可以自己安排，收入除比做藝人時穩定，也有時間享受家庭樂。他揚言不放棄演藝夢，但必定家庭行先：「我當然會將一切希望擺喺兩個小朋友身上，希望可以做到『100分好爹哋』。」
撰文：比華利
攝影：陳慧安
場地提供：Sci-Fit健身中心