特首林鄭月娥即將喺本周四到灣仔伊館同市民舉行對話會，呢個對話會得150個市民參加，又唔畀帶頭盔等代表反送中物件入場，林鄭有幾想聽民意，怕且唔使多講，但佢噚日仲扮到好認真咁喺facebook發圖宣傳，換來嘅係逾兩萬人留言洗版，個個貼「五大訴求 缺一不可」。
林鄭喺個人fb為對話會發圖，圖上註明：「再艱難，也有出路，讓我們對話」（圖），聲稱宣告對話平台正式啟動，帖文甫出約10分鐘，已有逾400個留言，到噚晚仲去到2.4萬人，八方冇可能睇晒2.4萬個留言，但絕大部份寫明「五大訴求，決一不可」，當然都有藍絲撐林鄭嘅留言，但好快就俾成班網民圍攻，搞到「五大訴求，決一不可」留言，總有十幾廿個留言互片！當然亦有網民提出其他訴求，好似有人留言：「我只有一個要求，將班高官家屬嘅外國國籍全取消。愛國要留喺祖國建設祖國。一定要做mainlander。」其實林鄭使乜搞市民對話會，佢肯喺fb認真對話都夠晒。