梁振英身為國家領導人，名義上係全國政協副主席，應該留意及處理大事，蝦毛小事留番畀特區政府芝麻官去理，先至啱波路。現實上，國家事唔輪到佢理，只係政協一個花瓶，做實事，佢嘅國際名望、財力與富豪人緣，比同是退休特首嘅董建華差十幾皮，有位捐過款嘅人士同左丁山（好耐之前，有咗反修例運動之後，佢驚住染到小小左丁山嘅黃氣，已暫緩交往，做大陸生意，沒有免於恐懼的自由。）講過，老董叫人捐錢（主要係捐畀團結香港基金），一個早餐已經可以籌得幾百萬，老梁呢？打個哈哈就算。
既然咁鬼得閒，梁先生於是有時間po一張黃之鋒在美國國會嘅相片，加以「嘲諷」：「打了領帶，肯定是見洋人了。」朋友N見到，直情嗌救命，話估不到前特首竟是這般水平。
到教育局警誡兩位「黃師」，不予除名之後，梁振英又有評語鬧教育局長楊潤雄：「拖泥帶水，姑息養奸。」楊局長見到前上司咁鬧佢，敢唔敢還口呢？當然不敢，唯有暗啞抵。前特首曾蔭權唔like梁振英，早已不是秘密，但係幾時見過Donald公開月旦CY，前特首應該有啲氣量嘛！
有梁先生呢類人咁關心教育，教育界備受壓力。一位中學校長、中學校長聯會主席鄧振強就曾在電台講過，成間學校承受最大壓力之人，最需要心理輔導之人就是校長，全校所有事情，校長一個人孭晒。連警察都搞WhatsApp爆料電話線咯（按：已被停止），學生好，家長也好，現在無時不投訴這樣那樣，搞到校長吃飯睡覺皆不靈。左丁山識得不少教師，特登問過兩位有甚麼壓力，一位行將退休嘅老師話：「我只望穩穩陣陣做到退休啫，藍學生問時事，黃學生問反修例，我都照足校長命令，嚴守教育局指引，畀標準答案：我唔係幾識呢啲事，我唔知，請大家判斷！」學生問嘢，老師答乜都唔知，都幾好笑，但現實如此，奈何。另一位嘅中年教師就比較進取，勇於作答，點知即刻引來一封家長投訴信，畀校長召見，照肺，警告佢要緊跟教育局指引，答唔知！
家長投訴啲乜？原來該家長係深藍，成日叫個仔舉報老師親黃言論，老師講咗一次西方價值觀與內地價值觀之不同，即時惹禍。老師話班上學生多數親黃，親藍係少數，見到黃學生經常在討論時圍攻藍學生，令藍學生唔敢講嘢，又覺得過份。總之，左右做人難，上課時，壓力大到不得了。
追究根由，當然係一個政治問題、政制問題，今政府與民建聯刻意用收地起公屋為解決社會矛盾方案，完全不敢講政治，轉移視線而已！