講開689，呢排佢追打上屆佢有份委任做副局長、現為教育局局長嘅楊潤雄不遺餘力。
表明港人最怕內地化
前港區人大代表朱幼麟對689退而不休指指點點好不滿，向中國國國家主席習近平發公開信，狠批689做法不當，形同話畀人知，「官大，有特權，甚麼事都可以直接管」，反問今時今日嘅香港，「到底，是否是人治多過制度、法治？」不忘向689發溫馨提示，「香港退休特首要真正退休」。
人稱「飛天朱」嘅朱幼麟前幾日見到689大鬧楊潤雄，而楊潤雄回應時竟然話「會深深反省」，觸發飛天朱要向習近平發表公開信，表明港人回歸後最怕嘅就係「香港內地化」，特別係政治上嘅「關係」同「人治」，認為今日香港所有政治問題、年輕人嘅問題、我哋失去整整一代人嘅問題，都同呢點有直接關係。飛天朱接受八方查詢時話，689以前特首、全國政協副主席身份透過fb直接批評楊潤雄，正正係做咗香港人最驚嗰樣嘢。佢認為楊潤雄聽到689嘅批評後，應該向身為中國國家領導人嘅689指出，如果對佢工作有意見，應該私下向中央港澳工作系統表達，再由呢個系統轉告林鄭，而唔係自己透過fb直接向佢提出。