【濫權搜身】
【本報訊】「唔會再夠膽望住警察，硬係覺得佢又會衝前嚟捉我，又要我重做嗰啲動作。」Winnie（化名）事後產生的恐懼，代表在羈留室的那段經歷，一直赤裸裸的，在她腦海中纏繞不斷。早前同樣被裸體搜身、並被警員以筆擊打大腿的事主呂小姐挺身開記招，對警方的行為勇於指斥，成為Winnie的強心針，「佢都係想社會知道，警察做嘅事有幾離譜，希望有多啲同樣遭遇嘅人企出嚟發聲」。於是，她帶着陰霾，坐在鎂光燈下，成了鏡頭下的這個黑色身影，重組她經歷的那黑暗五分鐘。
記者：盧珮瑤
在一次反修例運動中被捕，Winnie形容是純屬不幸。因自己並非前線，卻因逃跑時被其他示威者絆倒，成為警員的「獵物」，「當時速龍喺我背後打我，向住頭同膊頭打」。隨後有兩名警員對她即場搜身，一名女警隔着衣物輕拍她的身體，另一名男警在旁觀察。事隔一段時間後，Winnie就其案件提堂。上庭前，她被兩名女警押到法院的羈留室，其中一名女警粗暴地推其背部，並喝罵「行快啲啦！」到達羈留室後，兩名女警分工合作，一名與Winnie進入室內，另一名則在門外駐守。
進入羈留室後，女警要求她「除晒身上所有衫，包括內衣褲」。她大感困惑，反問為何要裸搜，「佢答話『因為呢度係法庭，要嚴格啲，唔係人人都入得』」，她誤以為是正常程序，遂依其指示脫衣。女警隨後又要求她做「踎低起身」動作三下，Winnie做了第一下，女警再以「踎得唔夠低」為由，要求她重做動作。
整個搜身過程歷時五分鐘，Winnie穿回衣服，被帶到另一個羈留室等候上庭。離開法院時，她更再度被警員指罵「曱甴！就係你哋呢啲人搞亂晒香港！」全程警員都並未有讓她簽署搜身同意書。
「搜身嗰陣我背住走廊除衫，我唔知道出面有冇人經過見到，或者會唔會有CCTV。」
Winnie事後告知律師其裸搜過程，才頓覺搜身程序不尋常，「好明顯係畀佢哋侮辱，因為搜我身嘅又係女警，佢哋都知道女仔喺人面前全裸，係一件好羞恥、屈辱嘅事，但依然恰我唔識法律上嘅程序，要我全裸畀佢哋睇，我覺得完全係搵我嚟取樂」。她又指，羈留室的門為鐵欄，外面走廊亦隨時有男女警員經過，質疑為何在非密閉空間裸搜，「搜身嗰陣我背住走廊除衫，我唔知道出面有冇人經過見到，或者會唔會有CCTV（閉路電視）」。
Winnie已記下了相關警員的編號，待自身案件結案後便考慮追究。不過，她坦言事後抗爭的心態有所轉變，變得保守，「變咗超級和理非，有不反對通知書嘅先會去」。是為了自身安全，亦是為了逃避恐懼源頭，「唔敢再望警察，覺得佢哋望我嘅目光好唔友善……硬係覺得佢哋會再衝前捉我，又要做嗰啲動作」。
言語充滿恐懼，內心充滿憤怒，但要具備勇氣，則全因呂小姐的挺身而出，「其實一諗起我唔係單單一個被咁樣對待嘅個案，就覺得更加要爭取我哋應該有嘅權利」。此事更令她認為新屋嶺的強姦事件是真確的，「你睇佢哋（警員）嘅嘴臉，同叫得示威者做『曱甴』，即係唔當示威者係人，咁你就覺得自己做乜都係可以接受……女仔受到呢啲侮辱，佢哋嘅情緒波動同反應，比男仔起伏更加大，佢哋睇到咪有滿足感囉」。
呂小姐的勇氣將她從黑暗牽引出來，今天，Winnie亦希望自己成為他或她的後援，「唔好忘記你嘅遭遇，所以你更加要企出嚟，話畀全世界知，警察並唔係正義嘅一方，佢哋做嘅嘢完全違反人權、人道……心理上承受到呢個壓力嘅話，就無論如何都要企出嚟」，她透過鏡頭，對一班可能還在黑暗中的受害者說。