其實我真係唔想寫你；名字不願提，連諗都唔想諗起你，印象太模糊，過去一百多日尤其，不時潛水，無影無蹤……一位特首，本來位在香港最高領導人，遇上香港百多快二百年來最大的事件，理應積極參與尋求化解困局嘅方法，你當然冇做到，甚至比平常日子更加Hea，更似不時放大假！
唔想諗起你，因為吾愛香港由你開始散咗、徹底散晒；諗起你個樣、諗起你無心遊埠事實時時刻刻遊緊埠把發言聲音與空洞內容，從開始時憤怒，百日之後已超越憤怒到達失望，然後失落、模糊。無論探訪幼稚園、老人院、你班馬仔向巿民派錢……你的「努力」對我已無丁點刺激作用，偶然從手機或茶餐廳電視機螢幕上無心瞄過，只覺得閣下面目模糊、聲音模糊、整個人的動作都嚴重模糊。起初以為時限到了，一直引以為傲幾廿歲仲未有的老花眼已達臨界點，殺到埋身，是以睇人睇事一切矇矓；事實未至於此，只要將視線轉移，與你保持遠距離接觸，哈！雙目清明，繼續保持紀錄，同期書友朋友唯一一個未使染髮、未使戴老花鏡的紀錄，條件之一：轉移視線，與你保持距離。
望得你多會錯覺出現老花眼，但跟白頭髮又有乜嘢關係？
道理很簡單，星期天大好清晨，初秋的清涼已讓空調冷氣收工，原本心情大好，無奈坐下打字寫你，𢱑晒頭，根本無厘頭，白白將大好時光浪費，扭盡六壬需精力，精力濫用傷腎，腎虛則力不從心，腎氣不足黑髮大忌；聽講閣下在過去百多日至傷腦筋不是香港存亡，而是洗頭理髮染髮無門。來到如此局面，七十周年國慶不如文革樣板戲上身親身上陣獻中華，不用染白頭髮或者戴上銀白假髮，即刻可演可歌可泣，戲劇性濃郁《白毛女》。對，白毛女至適合你演啦，外面大風大雨，逃避現實潛水躲進無人山洞，光想那明兒醒來如何洗頭，足叫閣下一夜白頭。《白毛女》未夠刺激？未夠入肉？請考慮演繹《白髮魔女傳》。
好彩不用經常思考閣下，不然度稿下筆寫多幾次，足夠多年拒絕白髮的道行一朝喪，進入銀髮行列。
香港快亡啦，請保持形象模糊、語言模糊、與一百五十名精心甄選跟閣下會面人士真誠模糊對話；烚吓烚吓研究如何提早將香港歸西！