郭富城昨日在尖沙嘴出席活動,早前為人氣洗腦兒歌《Baby Shark》拍新MV的他,即席與小朋友大跳Aaron Kwok Style「Baby Shark Dance」。城城笑言應該有爸爸版,又表示大女Chantelle看過他與Baby Shark的MV後,開心得攬住他錫錫,邊說邊冧笑,露出一面慈父相。
遺傳跳舞天份
活動完結後,城城受訪時指大女很喜歡《Baby Shark》:「佢一扭計就要聽,我同佢一齊睇,原來小朋友世界入面都有神曲,唔係淨係《對你愛不完》、《唱這歌》係神曲,我都好開心可以融入小朋友嘅世界,所以今次拍呢個MV,我都有私心,因為可以受惠埋囡囡,所以更加願意做呢個job。」他亦有教大女跳舞,讚她很有跳舞天份,城城說:「佢𠵱家都有上音樂堂,唔知係咪爸爸做呢行有關,我覺得係有囉。」
城城透露私下拍了兩父女齊跳《Baby Shark》的片段,至於會否公開分享?城城坦言從前很想保護女兒,現時心態已改變:「我做呢行咁多年,要保護番自己嘅小朋友,有時同傳媒朋友講,唔好兜口兜面影我個囡囡,但係我𠵱家有少少改變,等我同太太商量吓,因為小朋友都返N班。公開唔公開片就遲一步啦,我樂意分享,不過唔係𠵱家。」
行公園感浪漫
日前與太太送女兒上學,城城表示很感動:「睇佢行入去課室嗰陣,我改變咗我個思想,我覺得佢要去學習過點樣合群,點樣群體生活。佢返學冇喊,因為太太帶住,只可以一個家長帶,太太同我講囡囡都OK,可以適應。講個秘密畀你聽,其實佢今日有嚟到,但係你哋搵唔到佢,我都唔知佢去咗邊,我特登叫佢嚟睇爸爸工作。」
提到早前與太太甜蜜遊維園,城城表示11月將開拍電影,片中飾演一名高科技的偵探:「基本上拍電影就冇晒自己嘅時間,所以作為丈夫、爸爸,要多啲陪太太同小朋友,其實行公園係一件好浪漫嘅事,太太懷孕嘅時候,我哋都係經常行,因為公園嘅環境同空氣都比較好啲。」
採訪:黃曉妍
攝影:陳慧安