ViuTV新一輯《全民造星II》真人騷已掀起戰幔，一百位參賽者進行選拔，節目將於下周一推出。新造星熱鬥之時，《蘋果》找來第一屆的姜濤、陳卓賢（Ian）及Anson Lo進行新舊造星對論，三人分別揀出心水參賽者包括大熱的吳啟洋、Aiden及Hugo，細說選秀時秘技。
作為師兄的姜濤、陳卓賢及Anson Lo分享選秀秘技時，提醒切記重點是不能得罪霸氣節目監製「花姐」黃慧君。姜濤參選時為花姐大愛，他拋出最大貼士：「花姐嬲時記得要讚花姐靚就冇事。」
卸任沒有不捨
Anson Lo指花姐和冠軍只得一個：「唔好諗爭花姐，反而可以主動幫花姐做好多嘢，例如佢肚餓時千祈唔好問佢想食乜，直接幫佢安排佢就會覺得你全能好有用、good boy。」Ian教路比賽時遇上爭拗的做法：「每人有自己想法原則，最終目的想件事好，呢個比賽好玩地方唔係自己一人，係團隊精神先令你行得更遠，大家要坐低傾掂佢。」今屆參賽者中，吳啟洋是新《造星》中的大熱，Aiden則以演戲唱歌晉身，Hugo自小愛搞鬼搞馬，今次將本身性格運用在表演上，以真性情拉票。
大師兄姜濤就貼吳啟洋，他解釋：「今屆參賽者中相對最全面一位，身高或外形表演符合大眾style同普遍標準，第一次公開試時已有驚喜，有啲人天生有一種感覺令佢吸引你。」對於即將卸任，姜濤沒有不捨：「100萬唔係咁易拎，要過關斬將，我唔會唔捨得，又唔會叫我攞番100萬出嚟。」不過《造星II》已不設100萬獎金。
吳啟洋壓力大
吳啟洋被師兄貼為大熱，他未有因此而自傲，反而是感到超大壓力，他坦言經常被花姐踩沒有星味：「完全地誇張咗我，今屆唱歌跳舞嘅人都好勁，我自己好多不足地方，仲係好嫩。」雖然與姜濤給人感覺似深交好友，但他指兩人不太熟，姜濤就界定為三分熟。
Aiden稱善意
Aiden對於「最重要獲花姐歡心」建議，因第一輯時花姐已明目張膽地表現霸道，他也有同感，亦慶幸未有得罪對方：「覺得花姐好多時聲量比較大，但出發點係善意，係好好導師，雖然好似乜都鬧，好mean，但想我哋推進。」
Hugo紙咁柔軟
Hugo大膽指花姐是紙老虎：「喺大家面前好惡好嚴厲對參賽者，但其實心裏好似紙咁柔軟，可能會覺得佢偏心某啲參賽者，其實佢想每個都好，係媽媽心腸。」
撰文：卓寶花
攝影：陳俊強
場地提供：桔梗
