訪問前一晚，陸詩韻才上完一堂心理學，這個9月開始她重拾學生身份，報讀了公開大學兩科課程，「同學乜人都有，好大年紀嘅師奶都有，瞓覺都有㗎，我覺得大部份都係想讀書嘅！」她說：「我坐第一張枱㗎！」
陸詩韻除了拍劇和讀書，還得花時間在她的美容生意，網店開了四年；自家美容品牌也營運了兩年了，近來亦不忘在面書開直播做埋KOL，分享示範產品。
靠自己總比靠男人好？「我從來都冇靠過其他人，我諗我個人冇乜安全感，我諗我靠人，唔覺得係我一路想嘅嘢囉！」
一朝被蛇咬。13年遇上大馬未婚夫吳銘偉，原來對方早有家室，一直蒙在鼓裏的陸詩韻，更被對方騙了當上公司借貸擔保人，遭銀行追債。
人財兩失，「都幾失敗㗎！自己選擇去行呢條路，你就要去承受呢個結果。」尋尋覓覓，背上釣金龜之名，38歲的陸詩韻說：「如果講話釣金龜，我應該都嫁咗，我都唔使繼續自己做！」
撰文：文嘉龍
攝影：沈健程
失敗嘅感情經歷
新一屆的港姐誕生，有「港姐之母」稱號的陳紫蓮（Rosa）卻仙遊。服務無綫40年的Rosa，08年退休前一直是港姐的大會副統籌經理，見證了港姐最鋒芒的歲月。陸詩韻是05年港姐亞軍，Rosa也確實是她的人生導師。
有三年冇見Rosa的陸詩韻說：「突然間諗返晒好多嘢，人就係咁，突然之間失去咗嘅時候，就會話點解我嗰時唔去接觸多啲，覺得好可惜。其實選港姐講番我05年，都14年喇，嗰時好多好得意嘅回憶，因為Rosa好着重港姐形象，佢好鍾意有個手勢，我哋成日都笑嘅，就係『女仔、女仔』，佢隻手好得意好似海豚咁樣呢，大家女仔好有共識，我諗一講呢個手勢我哋就記得係Rosa囉！」
「港姐之母」連港姐們的私生活亦都照顧十足，像陸詩韻13年被雜誌拍得與男人汶萊伴遊，當年陸詩韻即向Rosa求救，經Rosa安排開記者會澄清，交代同遊汶萊的男人，是她的大馬未婚夫吳銘偉。
「當時我就好嬲，其實我已經冇喺TVB，但係我都打電話畀Rosa，我話出咗呢件事（雜誌封面），我話覺得好影響我。Rosa就好好，佢苦口婆心問咁嗰個係咪你男朋友呀，我話係，其實係未婚夫㖭，佢話咁你講出嚟咪啱囉，佢教我咁樣做。其實嗰時我已經唔係公司嘅人，但佢都好盡心盡力幫我，有時半夜打畀我提提你先，如果開記者會就咁咁咁，照講實話啦！我好深刻印象係Rosa半夜諗起嘢，真係半夜點幾鐘，我冇諗過Rosa仲未瞓，佢真係會打畀我！Rosa安慰咗我一輪之後，佢話既然係事實（有未婚夫），不如講出嚟啦，幫我渡過咗呢個難關囉！」
比較諷刺的是，公開有個大馬未婚夫之後，原來未婚夫一早已是人夫，更被揭是「老千商人」，陸詩韻與對方共同開設的貿易公司，陸所簽下的公司借貸擔保人，要負上還債責任，正式人財兩失。「𠵱家講返，都過咗咁長嘅時間啦，對我嚟講，我已經係冇問題，照講出嚟，因為每個人都有經歷，我覺得呢個經歷係算失敗嘅感情。」
釣金龜我都嫁咗啦
陸詩韻慶幸的是，這段愛情重傷發生在仍算後生的日子，如果今天才遇上，肯定更傷。「我信一個人太投入嘅時候，好多嘢係睇唔清，變咗你自己選擇去行呢條路，你就要去承受呢個結果，我亦都覺得好彩嗰時都算幾後生，32歲，如果再遲啲先經歷，或者𠵱家先經歷，touch wood，都唔知點樣可以令自己思維再重新振作，阿Q精神啲話畀自己聽，畀我早啲遇到，但係都spend咗一段時間，我諗有九個月我個腦一片空白，覺得自己點解咁冇用，點解會咁蠢呢？spend咗九個月至一年嘅時間去recover呢件事，自己重新再嚟過。」
與未婚夫分手，陸詩韻要為簽下的借貸擔保而孭數還債，「感情加事業等如零，真係乜都零喎，嗰一刻係好難接受，自信心係跌到貼住個地下！」她說：「我一路都覺得，有權利就有義務，既然啲嘢我簽嘅（擔保人），我都要負擔番呢啲嘢，我唔會話考慮走咗去唔理，走佬，呢啲嘢唔喺我字典裏面。我係比較硬淨嘅人，我都要負擔番！如果仲有一絲嘅牽掛，條尾巴斷唔到，唔好再expect對嗰個人有幻想，唔好再expect佢會畀返錢你，唔好再expect任何嘢，咁先至可以斷得到，即係要好狠，我都算係咁㗎喇！」
最傷的這一次之前，陸詩韻的情史都沒有好結果，不過個個都有來頭，如富商曾文能、「廉署剋星」林炳昌、「油王」朱明等等，最經典是拍得與曾文能蜜遊日本，又登上雜誌封面，同時間被封富豪殺手、釣金龜。
「每個女仔都希望有一個愛自己嘅人，𠵱家呢個社會亦都好現實，大家都希望大家有經濟能力，呢個係非常之正常㗎，冇話釣唔釣金龜。冇辦法，我覺得時間係可以證明好多嘢，正如嗰陣時，講緊十幾年前嘅事，我諗都有11、2年，到𠵱家，講真吖，如果話釣金龜，我應該都嫁咗，我都唔使繼續自己做，我嫁咗啦！如果我真係可以釣金龜，我使乜咁辛苦做，我掛個名靚靚咁行出嚟，橫掂你哋都話我釣金龜㗎啦，點解我唔真係做畀你哋睇呢？我成日都覺得時間係可以證明，不過冇辦法，你哋鍾意點講，我都控制唔到，我交代咗我自己就OK囉！」
陸詩韻承認，她的確對年紀大的男人較有感覺，姊弟戀在她身上不會發生的。「姊弟戀我諗我接受唔到，細我一、兩年都絕對接受唔到，我其實有個細佬㗎喇，我覺得同年紀嘅男仔，我唔係話佢哋思想唔成熟，不過我𠵱家諗嘢比以前更加深入，如果細過我，我變咗覺得有少少湊細佬嘅感覺，唔係愛情嗰種感覺囉！」
離過婚的，她不介意，「可能大我五年或者以上，或者係五年、十年，我絕對唔介意，就算離過婚我都唔會介意，因為我覺得佢會更加識得照顧我，同埋知道乜嘢叫做錫一個人愛一個人；反而外表，正正常常一個男人，我係冇問題，我絕對鍾意睇靚仔，但係你問到講對象，我又冇特別幻想一個靚仔係我老公、係我男朋友。」
娛樂圈冇乜安全感
一朝被蛇咬，對愛情不敢再投入？「呢個係一個經歷啦，會保護自己多咗，我係好易投入一啲嘢，但真係會小心咗啦，唔係對愛情冇信心，我成日覺得你個人心正，你唔係去害人，我唔覺得個天會對你好差，由始至終我都冇呃過人，我唔覺得個天對我要咁樣囉，可能就算到咗最尾係唔結婚，我相信佢（上天）都會畀到一個好好嘅另一半我。」
近年圍繞身邊的名字，再不是甚麼富商名人，換來是舞台劇演員兼魔術師高正安，有說兩人14年演出舞台劇《千奇百解》擦出愛火。今次陸詩韻學精了，只說這位魔術師對象「了解中」，「我每次啲戀情都係好似見光死呀，所以我都唔想特別去講，但係我覺得佢好好嘅，佢係一個好好嘅男仔，可以深入了解吓，佢都好了解我㗎喇，佢係一個好好嘅對象。」
09年曾經為幫父親打理製衣廠生意而退出娛樂圈，「其實我由始至終都覺得娛樂圈對我嚟講冇乜安全感，我掌握唔到呀因為，唔係話我講嘢叻做MC（司儀）好，就會有工作、唔係話我做戲叻我演得好就有工作，即係好被動，有好多因素令到你有冇嘢做，我好怕每日要等電話，我嘅schedule係點呢，我唔係好enjoy呢件事。我屋企又係做生意，我就諗有乜嘢係我掌握到把握到，嗱，輸咗都係自己嘅事吖，都係我自己揀嘅，起碼我可以掌握到件事。」
網上美容生意當初也碰壁，一手一腳自己同日本公司傾代理，再到慢慢發展自家的品牌，一步一步小本經營。「自己去日本搵廠，初初都係食閉門羹㗎，send email過去又唔覆，惟有自己寫proposal sell自己囉，我係香港小姐Miss Hong Kong陸詩韻，你上網可以睇到我啲資料㗎，我都有去過日本拍過啲旅遊節目，你睇吓報紙都有出……其實有啲面懵㗎我覺得sell自己，但係冇辦法，我點樣可以入到佢個門口呢，我惟有咁樣。」
要不停有新產品推出，也是另一種負擔，「其實都有啲樽頸位，因為要不停出新產品，對我嚟講都幾攰。我自己頭嗰幾年冇出過糧，自己冇袋過錢落袋，因為你就算搵到錢，你都係放返落公司，係一個雪球喺度滾，係近呢一年先至叫有少少糧出吓啦！」
最終目標，陸詩韻始終想開實體店，不過心態上和以前很大分別了。「以前我開貿易公司，細個吖嘛嗰時，乜都要好靚嘅門面，開公司就一定要夠大，嘩落地玻璃，睇住靚環境，請就請十幾個人嚟幫我做嘢，嗰時門面比較居多，成本就會計每個月五萬租金，一年咪六十萬囉，我蝕晒都係六十萬，但係又未計人工喎，仲有水電煤，唔識呢啲嘢；𠵱家唔係喇，全部都係將佢縮到最細嘅cost，好彩我屋企做製衣，我就喺度割咗我爸爸個office裏面一個用嚟開會嘅房，用嚟做我一個小小嘅陳列室，將個皮費減到最低，人方面我就請啲part time女仔幫我做，我覺得已經應付有餘。」
【後記】和你飛
自細立志選港姐的陸詩韻，參選前當過OL做秘書，20歲獲大韓航空取錄做空姐，兩年後轉到維珍航空，如果當年24歲沒有參選港姐，陸詩韻說應該仍會做空中飛人。
「我諗我會繼續做空姐，我選港姐係因為我要完成夢想箒，由細到大都想選港姐，我好勝㗎嘛，我要乜都試，但係如果唔選港姐，我會繼續做空姐，我會做到senior做到purser（事務長）嗰啲位置，跟住可能飛到四十零歲我就唔飛喇，跟住落返嚟做trainer、做地勤都唔定喇！」
飛不了，還是腳踏實地好了。
場地提供：Teppanyaki Kaika（The ONE）