「朱古力」同「型妹」有過短暫情緣，雖然做唔成情侶，但再見亦是朋友，分手後變咗情人知己，不但有偈傾，仲會互相關心，最近仲齊齊出嚟慶祝生日。講開朱古力份人都算有情有義，好似佢識於微時嘅女友「明明」，雖然大家分開咗，但係朱古力亦一直供養緊佢，每個月都會畀家用，仲有打本畀明明做生意，所以明明𠵱家不愁衣食，唔使做仲過住優哉游哉生活。
雖然朱古力係城中鑽石王老五，但其實十幾年前佢都有諗過成家立室，嗰時同歌星仔「羊羊」秘密拍咗幾年拖，但因為兩個都有啲名氣，所以約會就局限喺屋企，羊羊嗰陣一直想公開戀情，但朱古力就唔想，搞到女方好冇癮。其實朱古力當年有諗過娶羊羊，最後因為想事業再上一層樓，所以放棄咗，羊羊就覺得朱古力好似得個拖字，把心一橫索性分手。不過，朱古力有次飲大咗，就同朋友呻：「呢一生人都係得呢個女人令我想結婚。」緣份嘅嘢，係你就係你。睇番轉頭，朱古力真係好掂，個個前度都可以再見亦是朋友，證明佢冧女係有一手。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。