長輩S賜飯，到陸羽飲茶，吩咐左丁山叫幾位老友嚟傾吓偈。長輩有命，豈敢不從，於是幾位老友召集，律師T回覆：「好想嚟，但要開會，撞到正，恕難出席。」S先生令我想起我嘅開山師傅S，佢已入咗養和近六個月，令我心掛掛，師傅S與S先生係同一代人，晚年健康有大差異，好難詳細解釋，只能夠話一聲：「請珍重身體。」
卒之搵到退休得閒嘅名嘴N，新亞師兄也，又有當打嘅月刊總編輯T，新亞師弟也，加埋土地經濟／規劃專家教授L，剛剛好。上到陸羽二樓，見到一枱有七八個退休新聞官在座，高談闊論，其中一位問左丁山：「最近好嘛？」左丁山答：「如此時勢，還可到陸羽嘆茶吹水，算係好咯！」佢地更算係好上加好箒，如仍在政府新聞處工作，依家可能要承受龐大工作壓力，邊可以中午到陸羽吹水呀。
我地在房間坐好後，互問近況，名嘴Ｎ話日日有時間讀書，心境愉快，最近猛刨外國書，論自由On Freedom on Liberty呢類書，有感而發，爭取自由非常重要。一個人如無思想自由，言論自由，行動自由，樣樣要聽黨話，跟黨走，咪似是一個Walking Dead。咁又係，佢以前係名嘴，如做節目要跟稿讀，背書，聽上司命令而講，還有甚麼樂趣。
老總T自幼在福建農村長大，來自大家庭，佢話家庭內堂兄弟姊妹眾多，人人要聽大家長講，各親戚縱有不和、吵罵，但無人膽敢離開出外獨立搵食，老總T話：「小農大家庭其實反映大部份中國人面貌：一、要維持家庭統一，不分裂；二、要聽大家長說話；三是內裏有鬥爭。」又幾貼切喎，老總T對中國經濟、民生、思想有研究，內地人點睇香港反送中條例？老總T話：「據我了解內地學生及知識分子緊抱大一統觀念，不同情香港人，一致反香港，況且佢地生活在微信世界，一切消息來自微信，對香港資訊之認識基本上是官方認可言論。」教授L話佢嘅大陸學生開學後睇得出不自在，唔快樂，有啲惶恐，不敢同香港同學討論，又怕有人篤灰，在港留學暫時係痛苦經驗。至於現在政府民建聯合唱引用《收回土地條例》，教授L係呢方面專家，佢嘅判斷係知易行難，隨時陷入官商勾結，利益輸送陷阱，或是法庭相見，官司沒完沒了，政府欲轉移視線，以房屋方案解決政治死結，只係浪費時間。