現年62歲的無綫前藝人吳博君，去年3月突然感到四肢無力癱瘓入院，後來證實患上罕有的運動神經細胞疾病（漸凍人症），最嚴重時需在床上解決大小便。吳博君患病期間，全由患有小兒麻痹的太太照顧日常生活，兩人互相扶持。
否認網上眾籌
吳博君曾透露醫藥費龐大，每月醫藥費約一萬元，他失去工作能力後，幸有不少朋友如劉德華及薛凱琪等相助。不過，他患病已一段時間，演藝人協會早前為他開設專戶籌錢，希望大家隨緣樂助，還透露：「早前有個有心人每月資助他，但最近開始停咗資助，而吳博君的情況只申請到傷殘津貼，未能申請綜援，經濟上需要幫忙。」
《蘋果》昨日聯絡吳博君，起初由太太代為接聽電話，她否認搞眾籌的報道，並說：「之前有位有心人每月資助少少錢睇醫生同交通費等，最近冇咗，我哋未去到咁拮据，經濟上係有少少壓力，所以搵演藝人協會幫手。佢哋好熱心幫我哋內部籌款，其實係內部通知一啲藝人，但安安姐（余安安）、薛凱琪比較熱心，喺fb post咗出嚟，所以先搞到好似網上眾籌咁。」
四肢漸趨乏力
談到病況，吳博君親自受訪，氣若游絲地說：「略為差咗少少，呢個病都係慢慢差落去，差到最後就完全唔郁得，當然唔希望見到呢一日啦。」他現時出入需要坐電動輪椅，在家中亦要用四腳架支撐行路，他續說：「呢排突然間弱咗好多，行起嚟冇咁有力，手都係，𠵱家拎筷子同碗都唔係好得。」他否認搞眾籌，但坦言有經濟壓力，亦藉此感謝各方友好：「要多謝嘅人太多，個個都好熱心幫，而我亦已盡我所能克服病魔。」
採訪：嵐山