區議會選舉將至，唔少政黨好努力爭取選民支持，社區主任都會幫街坊申請吓福利。不過工聯會竹園南社區主任李健聰嘅橫額就引起爭議，有人質疑佢借一個協助申請中電減電費嘅服務，有違規收集居民個人資料之嫌。八方最近收到竹園南區議員許錦成投訴，話發現李健聰有一張協助申請中電減電費服務嘅橫額違規，引述中電話相關電費減免計劃只可以由認可非牟利機構申請，而工聯會並唔係認可機構之一。
申請減電費 非認可機構
八方搵過李健聰，佢就話「哦，咁樣，我查詢吓先回應你」，身兼觀塘區議員嘅工聯會何啟明就向八方澄清，地區工作成日會接觸到好多轉介個案，相信同事係透過橫額「話畀街坊知有呢個計劃」，如果有需要就將街坊轉介去認可非牟利機構，仲拉埋民主黨落水，話民主黨都轉介好多個案畀社署，唔通又係濫用喎！