執教咗中國足球國奧隊一年零九日嘅荷蘭名帥軒迪克，喺禮拜四正式俾中國足協炒魷。而足協即時成立咗一隊領導小組，去接手軒迪克嘅工作。據內地傳媒爆料，足協之所以炒軒迪克，原因係呢位荷蘭教頭嘅工作態度同用人方式都有問題，令到足協冒住影響備戰奧運資格賽暨U23亞洲盃決賽周嘅風險，都要怒炒軒迪克。
其實喺軒迪克接任國奧隊之後，就因為膝部關節炎問題，留喺中國嘅時間少之又少，但係就基於呢個原因畀人話佢「耍大牌」。內媒就大爆軒迪克喺今年三月尾，帶領國奧喺馬來西亞取得奧運預選賽嘅小組出線權後，呢位72歲老帥直接由馬來西亞飛返去荷蘭。直到五月尾，軒迪克先返嚟帶隊去法國出戰土倫盃，但之後佢又帶埋助教一齊返去荷蘭放假，總言之每次踢完比賽後，軒迪克就會飛返祖家而唔係留喺中國。
太老實寸強國未夠班
再者，軒迪克接手國奧隊後，成績唔算突出，有指佢從來唔睇中超，考察球員等嘅工作就交晒畀助教及中國教練團負責。加上早前喺中國黃石舉行嘅邀請賽上，軒迪克帶領嘅國奧隊先以1:1逼和北韓，之後又0:2輸畀越南，表現令人非常失望。
最重要係軒迪克上任時候曾經揚言要大打進攻足球，但事隔一年，面對北韓同埋越南呢班稍強嘅對手，國奧隊就破門乏術。輸畀越南後仲要推卸責任，怪罪落中國嘅足球管理同青訓不力，叫強國要認清自己實力未夠班。軒迪克被炒後，佢嘅工作就交由「中國U22國家男子足球隊備戰工作領導小組」接手，負責球隊訓練和比賽，組長係前國足主帥高洪波，郝偉擔任執行教練。
中國女子U16吞北韓4蛋
另外，由陳婉婷（牛丸）領軍嘅中國U16女子足球代表隊，噚日喺泰國舉行嘅亞洲女子少年錦標賽，以0:4大敗畀北韓，未能取得兩連勝。
曾帶領東方龍獅贏得港超聯冠軍，亦曾成為亞洲足協最佳女教練嘅「牛丸」，舊年加入中國女子U16成為助教，喺西班牙籍主教練年初突然離隊後，更接任成為主帥，首度領軍就喺濰坊國際青年賽封后，禮拜一女子亞少盃首場分組賽，中國女子U16仲以2:0擊敗南韓，可惜，噚日面對首輪以10:0大勝越南嘅北韓，中國女子U16全場得一次射門，相反北韓有逾70%控球率同29次射門，上、下半場各入兩球，以4:0大勝中國女子U16。
中國女子U16嚟緊禮拜日對同組實力最弱嘅越南，由於小組首兩名可出線，所以「牛丸」隊波晉身淘汰賽嘅機會仍樂觀，如果佢教得好，話唔定遲啲教埋男子國奧呢。