【娛樂人物】近年各電視台皆製作不少旅遊節目,有以性感靚女做賣點;亦有以達人推介深度遊等,各適其適搶客搶收視。近日ViuTV播出的富士山旅遊節目就派出岑樂怡及黃溢濠拍檔上陣,俊男美女,但卻以歡喜冤家模式主持,成功突圍,兩人不約而同希望可在這段抗爭日子為觀眾帶來一點歡樂。
撰文:羅慧敏
攝影:仇志德
岑樂怡(阿妹)與黃溢濠拍檔主持ViuTV最近播出的旅遊節目《富士山朝聖之旅》,兩人猶如歡喜冤家,不停打牙骹戰,節目中帶觀眾探索不少富士山秘密,獲不少觀眾支持,阿妹說:「暫時嚟講收視都幾好,我都估唔到,因為日本對好多香港人嚟講已經好熟悉,怕大家冇興趣睇,呢排政局唔係咁好,點解大家仲會花時間去睇呢?我諗𠵱家係需要啲輕輕鬆鬆、唔需要太用腦、風景又幾靚嘅嘢,反應咁好我哋都好開心。」他們沒有以任何人為假想敵,只期望這樣錯配的感覺能惹大家一笑。
歡喜冤家擦火花
節目行程圍繞富士山作中心,走訪山梨縣、靜岡縣、神奈川縣等各地方,原來黃溢濠是首次擔任旅遊節目主持,他直認相當緊張;阿妹表示原來兩人之前未曾到過東京,未親眼見過富士山,她表示:「拍嘅時候我都驚,旅遊節目我拍咗好多次,但佢就第一次,我怕個主導喺我身上,所以開頭我就逼佢講嘢先,由開頭係我蝦佢,去到後尾佢開始攻擊我,咁就變咗有火花。」
改稿爆肚跣對手
黃溢濠感謝阿妹帶挈他有機會做主持,阿妹聞言笑說:「監製問我想同邊個合作,我就話最近同黃溢濠及另外兩個男演員拍緊嘢,最後佢就搵咗溢濠嘞,好唔好彩。」身為師姐的阿妹指點黃溢濠自己的拍攝經驗,鼓勵他不要只跟稿讀,憑自己感覺分享,但黃溢濠也有投訴被阿妹整蠱:「本身我哋會夾好晒點樣拍,但係佢一出去就改稿爆肚,好彩我都接得住,我都做過吓戲,食過吓夜粥。」兩人回想拍攝時的趣事,也禁不住咯咯大笑,不過鬥嘴過後,他們皆希望有機會在大銀幕合作,繼續當一對歡喜冤家。