選舉近了，777呢個星期開始落區對話，龜縮咗成個暑假嘅建制派近排亦紛紛蒲頭想挽救頹勢。雖然比起克警，建制派可能冇咁難頂，但落區一樣辣㷫街坊，好似香港獨立媒體網前日有篇報道，話前日下晝禮義廉去咗九龍灣麗晶花園附近擺街站搞細路，配合佢哋早前公佈嘅學童書包重量調查，即場為學生書包磅重，點知引嚟女街坊踩場鬧佢哋做騷，仲問到成班區議員口啞啞，只係識用電話反拍對方。
前日禮義廉觀塘區議員顏汶羽、洪錦弦同歐陽均諾拉大隊，仲搵埋灣仔區議員鍾嘉敏同沙田區議員黃冰芬跨區支持，將調查書包重量講到係保護學童健康咁高層次，既然目的咁「崇高」，就惹嚟女街坊挑機，理直氣壯咁問清楚：「你哋口口聲聲話保護學童，咁有11歲小朋友俾警察捉嗰時，你點保護呀？」
呢條咁簡單嘅問題，已經令成班區議員集體語塞，女街坊再「乘勝追擊」，質問佢哋上星期六淘大有人打交時「你哋又喺邊？」呢個時候黃冰芬先醒水，示意職員反拍對方，而鍾嘉敏就機械式話民建聯反對任何暴力，仲話活動係關注學童書包重量，希望之後先同市民交流，但活動完咗即刻各自走，說好的交流亦數已走。
李八方