祖雲達斯前鋒希古恩日前喺操練度,因搶唔到波而發脾氣,亂踢場邊嘅教練同廣告板發洩。希古恩喺祖記星期三作客馬德里體育會前嘅操練,喺「馬騮搶球」環節搶唔到波後情緒失控,起腳踢場邊嘅教練,又連續踢場邊嘅廣告板幾次。
對於希古恩突然發火,佢部份隊友都一笑置之,古達度仲曾拍手叫好,其後亦做手勢示意叫佢冷靜,最後要由邦路斯將佢拉開後先冷靜番。希古恩今季喺三場意甲都正選,並入咗一球。