吃豬肉難 - 左丁山

吃豬肉難 - 左丁山

走過利源東街,看到一間小店的食品價錢牌,這間小店專賣燒烤物,只見一隻燒豬售價是三千四百餘元,不禁嚇了一跳,怎麼一隻燒豬要這麼高價錢。後來到喜萬年參加飯局,問經理祥哥:「點解燒豬一隻咁鬼貴?」祥哥話:「非洲豬瘟吖嘛,新鮮豬肉好貴,以前我地一隻小乳豬賣九百至一千,依家起碼要千二、千三蚊一隻啦。」受非洲豬瘟影響,內地肉價飛升,導致八月份CPI(消費物價指數)上升百分之2.8,係半年以來最高通脹率,假如用美國之核心通脹概念,扣除食物及燃油價,中國核心通脹率會低好多,但一般人民點會同你計核心通脹率呀,到街市買唔到豬肉就會怨聲載道,共產黨官員都唔敢忽視之。記得兩三年前紐約聯儲銀行高官見市民,話核心通脹不高,iPad價錢下降㖭,點知一位市民反應快,高叫:「iPad食得嘅咩?」高官為之面紅耳熱。美國人都如此重視食物價錢,中國古語有云,民以食為天,冇豬肉食喎,勢係假,故此中央為安撫人民情緒,兩星期前不惜打倒昨日之我,撤回部份養豬禁令,容許農民隨便養豬,地方政府不得依照環境保護條文來禁止養豬,為農民養豬大開綠燈。環保唔講嗱?小型養豬場幾污染環境嘅噃?唉,要保證有豬供應,唔顧得環保咁多咯,一切以養豬食豬肉為大道理。

內地豬肉價連漲14周,中央被逼出手救市,又話要輸入美國豬,順便益吓特朗普選民。唔講得笑㗎,豬肉價連漲六個月,再漲下去,搞唔掂,要返回改革開放前,憑肉票買豬肉。左丁山諗一諗,中國養豬業嘅生產力一定係好低,人地美國唔係有好多農民養豬啫,點解大型養豬場除咗滿足美國人食豬需求外,還可輸出?可以話美國人食豬冇中國人咁多,但其中一定反映咗養豬生產力之巨大差別,中國之小農經濟模式仍然係數千年不變,認真落後。左丁山問過一位中菜食店主管,香港人食豬靠中國係咪好唔掂?佢話:「唓,食肆嘅豬絕大部份係巴西豬,包括叉燒與燒肉,極少係大陸活豬,如果要賣貴啲,就以西班牙黑毛豬做叉燒,令你覺得高貴,肯畀錢!」又係嘅,中國人好食豬,多多唔夠,信報有數字,2018年全球生產豬肉1.13億噸,中國人食咗5595萬噸(49.15%),即係全世界為中國養豬,美國人每年吃豬一億頭,20年無增長,中國人20年前每年消耗4億頭,現已增加至7.38億頭。中國一定要自己養多啲豬至掂,靠進口唔靠得咁多,可惜呢,有非洲豬瘟喎,豬瘟從那裏來?一位中資機構高層對左丁山講:「唔可以公開投訴呀,否則影響習大大與普京嘅交情,因為當初從俄羅斯買豬,點知連豬瘟都買埋返嚟!」