前特首梁振英自從反送中運動越燒越熱，佢亦不甘寂寞四圍點火，又叫人篤灰、又搞教協、又搞大學校長，不過有時搞還搞，如果唔覺意兼唔小心搞埋國家主席習近平，佢呢個政協副主席又點交代呢？
八方所以咁講，因為689噚日係fb貼咗張似乎係翻拍《蘋果》嘅相，相中係香港眾志秘書長黃之鋒、歌手何韻詩出席美國國會及行政當局中國委員會聽證會，仲懶醒咁寫咗句：「打了領帶，肯定又是見洋人了」。佢班支持者就梗起晒哄，個個順住勢鬧之鋒、何韻詩，但好快有網民cap咗佢個po做二創，加多張689打晒呔見同樣打晒呔嘅習近平，仲抽水話，689打了領帶，佢見嗰個肯定又係洋人了！
網民競猜誰是西人
之後越來越多人玩689個po，有人話「習近平係美國人，（打呔見佢）有乜問題？」又有網民話689佢查實知唔知，習平時出席大陸好多官方活動，好似開兩會都係着晒西裝打呔？唔通又係見洋人？而689自己上京見領導咪又係打晒呔，難道佢又係去見洋人？所以有網民笑689：「估唔到前特首竟然on9到咁」，但最搞嘢係有網民拎住打晒呔嘅習近平同打晒呔嘅689握手相問，究竟習近平係西人？定689係西人？還是佢兩個都係西人？
李八方