以搞笑出位見稱嘅ViuTV騎呢組合ERROR，一直做出好多能人所不能嘅創作，四子同監製花姐早前一齊拍攝嘅旅遊節目《花姐ERROR遊》以搞鬼做招牌，發放笑彈大受網民歡迎。
自薦易被玩殘
前晚播出《花姐ERROR遊2》第一集，ERROR挑戰大膽尺度，真係睇到觀眾毛管戙。節目有一個自薦環節，每次都有新挑戰等成員可以威吓搶風頭，不過佢哋事先並唔知道玩啲乜嘢，舉手前要諗清楚，一唔小心好易被玩殘。
ERROR成員193（郭嘉駿）為咗一洗早前被隊員同花姐嘲諷「乜都驚」同「乸型」形象，奮勇挑戰蟑螂養殖場，被安排坐喺一張膠凳上沖涼時，將幾千隻「小強」由頭倒落193身上，瞬間佢全身被小強包圍，畫面極度震撼。193事後將感想寫喺Ig，更藉「曱甴」發表對逆權運動嘅睇法，警隊常以曱甴稱呼示威者，193嘲諷支持政府嘅人：「平時你見到一隻曱甴，可能會覺得佢搞住你，一下就將佢打死。但如果對住一大堆團結又頑強嘅曱甴，真係對付唔到，你最終都係會輸畀佢哋！」
撰文：馮仁昭
