路透上周爆出中央要求國企投資香港嘅消息，長遠影響認真大，未來港企被國企買起的話，係咪全都變成國泰（293）？間間都玩篤灰？呢一點大家都能夠想像，不用多分析。
以前內地企業投資香港，總帶點偷偷摸摸，開頭怕俾人鬧靜靜雞染紅，直至近年中央打擊走資，大陸嘅錢要落嚟香港都不容易。假如國家機器啟動，鼓勵國企投資香港，落香港shopping成為邀功一大任務，又可以將人民幣變成港元甚至美元，相信胃口會大開，有一條便利嘅渠道可予走資，莫過話央企國企，民企都會跟住響應。
國企投資香港係為走資？定為控制香港？邊一道先係主菜真係難以分辨，小弟覺得是前者。
香港大企業同國企有乜分別？最大分別係港企財政狀況係極極極之健全，負債比率奇低。以大陸企業嘅劣根性，假如佢哋持有一嚿穩健嘅cash cow港企資產後，適逢美國進入減息周期，甚至出現環球負利率，必然會將香港資產抵押狂借低息美元，加大槓桿，以香港作為起點，再以資本滲透海外。國企投資香港係咪真正成事？幾時起動？唔知，一旦成事對資本市場起嘅效應，就不能睇小。
晉佳
http://fb.com/advanceguy1
本欄逢周一、三、五刊出