同曼聯就續約問題擾攘咗好耐嘅迪基亞，周一終於帶畀魔迷天大喜訊，球會喺官網宣佈，已經同呢位28歲西班牙門將續約，雙方會維持賓主關係到2023年，而且球會仲可以好似之前份約咁，約滿前一年可以選擇同佢自動延長多一年。不過為咗留住迪基亞，曼聯都喺財政上付上代價，盛傳對方周薪會由原本嘅20萬鎊上升至25萬鎊，計埋獎金就會大幅上升到37.5萬鎊（約364萬港元）。由於之前高達50萬鎊周薪嘅阿歷斯山齊士已經被借去國際米蘭，即係話迪基亞家陣已經係紅魔陣中最高薪球員，多排第2嘅保羅普巴成8萬鎊咁多，睇嚟班球員又排隊扭計。
15年險加盟皇馬
迪基亞之前一直跳草裙舞，加上有時場上表現都幾飄忽，一時上晒身，一時又會失埋啲大意波，搞到曼聯球迷都唔多滿意。不過，曼聯同迪基亞喺周一終於搞掂所有之前未達成嘅共識，包括雙方喺薪酬上嘅分歧，迪基亞續約後就喺官網上表示好光榮，希望幫球隊喺未來爭取更多冠軍，而領隊蘇斯克查亦表示，好高興愛將選擇留隊，仲讚佢仍然係世上一流門將，希望球迷可以繼續支持佢。
迪基亞11年由馬體會加盟曼聯，為紅魔上陣367場，曾經同球隊一齊贏過英超同歐霸盃等，但喺佢效力嘅八年間，都不時有傳聞話佢想「脫魔」，最經典係15年夏天爭一步就過檔皇家馬德里嘅「羅生門」事件，因為臨閂窗一刻先傾掂數，但曼聯趕唔切遞交有效轉會文件，令交易最終告吹。
曼聯瞄準兩新星
紅魔同迪基亞高薪續約後，為重建王朝，有指球會高層準備喺出年增兵，鎖定多蒙特新星查頓辛祖同李斯特城中場占士麥迪臣兩大目標。不過，紅魔咁搞法只會負債越嚟越多，所以一直建議球會賣走普巴嘅名宿加利尼維利，最近又鬧爆普巴經理人拉奧拿，直指對方操作轉會嘅手法好可恥，認為曼聯應立即斷絕同呢位仁兄嘅合作關係，咪即係再呼籲紅魔快快同普巴「分手」，慳番一筆為未來重新鋪路好過。