「超人」李嘉誠近日呼籲執政者對後生仔網開一面，認為法律不外乎人情，點知俾北京同深藍絲群起攻之，當中工聯會嘅立法會議員陸頌雄前日喺fb出post攻擊超人斂財，最終俾長實集團反駁係假新聞，陸頌雄最後刪post兼道歉。
「fact check唔夠完善囉」
話說陸頌雄早兩日喺fb指控超人，話佢1987年投資興建深圳梧桐山隧道，擁有30年經營權，但2004年深圳政府打算回購並免費開放，李嘉誠就開天索價，最終深圳政府2005年興建第二條隧道，3年後免費開放，逼到梧桐山隧道2011年拍烏蠅兼蝕讓收場。就呢件事情，長實發言人噚日不點名話有立法會議員出過咁嘅post，「公司謹此澄清，李嘉誠及長江集團旗下公司均從沒有投資於該隧道。」即係話，陸頌雄個post係百分百嘅假新聞。
發現自己豬咗，陸頌雄就悄悄刪post，佢回覆本報查詢嘅時候就死撐，話單消息係網民share畀佢，內地網站都有相關資料，「所以都係有source㗎，但fact check得唔夠完善囉。」八方問佢會唔會同超人道歉，佢就停頓咗一下：「（個post）收回咗啦……不便之處，唔好意思。」話鋒一轉，「不過希望誠哥自己都唔好賺到盡啦，都要檢討下。」
其實工聯會突然向超人反枱，主要係因為上星期佢喺慈山寺評論「反送中」社會運動時，提過希望執政者能夠對「未來主人翁」網開一面，激到阿爺扎扎跳，繼而歸咎香港問題源自地產霸權，即係賴落超人頭上。超人就回應話係罪名莫須有，對言論曲解十分遺憾咁話。
李八方
