柳俊江、森美及林芊妤（Coffee）等昨日在尖東出席網上格價平台活動。柳俊江在7.21元朗恐襲當晚，因義載被襲擊受傷，他表示現時已經痊癒，不過日前他接受電台訪問時，直言沒信心到公立醫院求醫和報警，擔心自己由受害者變被告，問到是否不打算追究？柳俊江說：「目前冇乜深入嘅打算，坦白講，𠵱家大家都係見步行步，如果有個公平、公正、公開嘅處理渠道嘅話，咁就睇吓會唔會做，但係𠵱家冇吖嘛！」
製作公司工作叫停
對於有人不排除控告警隊「一哥」盧偉聰討回公道，柳俊江說：「有議員搵過我，如果一般市民，我覺得要透過法律途徑去爭取自己合理嘅權益，呢個先係法治，但作為一個公眾人物，喺𠵱家嘅政治咁複雜嘅時候，好多人就會話『同邊個議員夾埋嘅』，我又唔想，咁咪惟有唔好做任何法律行動住。如果市民需要協助，應該尋求可信嘅協助，同屋企人去商量，可能喺屋企入面都有唔同嘅政見，唔好因為政治而犧牲咗家庭。」柳俊江透露現時的市況較為淡靜，所以其製作公司一些廣告工作需要延期或暫停：「我哋仲發展緊網購嘅平台，亦會因為社會嘅事情同我嘅事情，就要押後咗少少，希望可以喺10月出到街。」
Coffee心痛囝囝出疹
同場的森美笑言購物很精明，最好有贊助商贊助。是否多給家用予老婆？他笑說：「老婆應該畀家用我，我都冇錢，我哋成家好似攞飯票咁問老婆攞錢㗎，𠵱家我網購，係老婆畀錢。」森美坦言精明消費好重要，儲錢是為了將來給子女。會否再買樓置業？他說：「我𠵱家仲供緊，香港人係咁㗎喇，用大半生嘅錢供一層樓，供完之後將來畀仔女，我就完成今生嘅目標。」
Coffee透露11個月大的兒子日前發高燒，近日又出玫瑰疹：「佢瘦咗5磅，好心痛，點解瘦嗰個唔係我，好彩我仲餵緊人奶，因為佢冇胃口食嘢，所以我日日俾佢『chur』到好似乾屍咁，真係好得人驚！」何時再計劃工作？她說：「可能近排香港氣氛唔好，我都接少咗工作，但OK嘅，多咗時間喺屋企，我好滿足，因為我可以對住個仔。」
採訪：黃曉妍
攝影：陳俊強