陳慧珊（Flora）近日以主持身份出現，和老公鍾家鴻以七位數字自主製作節目，碌盡人情卡邀請了重量級嘉賓亮相，分享在學校以外要如何自教。講到老公和女兒的年齡相差大，陳慧珊大爆女兒的同學叫鍾家鴻做「公公」，亦因為兩人遲當父母，思想及睇法與一般家長有分別。
撰文：卓寶花
攝影：陳慧安
現年49歲的陳慧珊拍劇多年，有不少經典作品，在2000年期間事業闖高峯，但她在2006年嫁與鍾家鴻，並誕下女兒鍾律然後，甘願當全職媽媽，直到2013年才復出拍《女人俱樂部》。成為人母後，Flora思想上自然有所改變，每走一步都為下一代及家庭着想，因此驅使她投身教育界，更學海無涯，現於香港大學教育系修讀博士學位課程。早前Flora和老公合作自編自主製作開電視節目《放學後》，碌盡人情卡請重量級嘉賓現身。
老公被叫公公
Flora形容自己「三遲」，遲當母親、遲入教育界、遲讀碩士，如今想將其演藝經驗拼湊教育界力量去完成一些使命，製作節目只是很初步。她坦言和老公都是第二段婚姻才生育小朋友，思想及睇法與一般家長有異：「𠵱家啲家長大約30歲，我哋係超齡家長，阿女啲同學叫老公做公公，我哋同普通家長有個gap，大學教授批我寫論文嘅都只係30幾歲。」鍾家鴻附和說：「我60幾歲，大家睇法好唔一樣。」
在美國接受教育的Flora，面對香港現今的教育方式，她說：「𠵱家已經改善咗，相信小朋友讀小學時應該去玩，爬樹、畫畫、跳舞，而唔係要做出任何成績，需要自己去探索，去面對學習解決問題。返學固然重要，讀到書係好事，但冇機會的話，好似吳鎮宇喺節目中講去圖書館睇書學習一樣有得着。」
醉心演藝事業
今次不惜工本自資拍節目，Flora既擔任監製又做主持，直言比預期超支，花費不止七位數字。她和老公感激嘉賓好友拔刀相助之餘，並點名稱讚林日曦，鍾家鴻說：「好欣賞佢say yes同做完件事態度，睇住佢由商台再創立100毛，最初聯絡佢時都未做上市公司主席，佢反問唔明點解我哋搵佢，話90%唔會做，後來聽我哋講咗五分鐘，佢就話99.9%會做，我哋要有不同階層人士分享。」說到底Flora挾着藝人身份，近年初嘗幕後滋味，她強調仍醉心演藝事業：「現時好似踩單車咁，但呢個階段上天想我做咗呢樣嘢先，有使命在身。」