上星期國家主席習近平接見新任澳門特首賀一誠，事後好多政圈中人留意到國務委員、公安部部長趙克志有出席會面，隨即有報道話北京已經安排趙克志出任港澳工作協調小組副組長，搵公安部插手搞香港反送中運動，但有政圈好事之徒留意到，習見賀一誠多咗個趙克志，但就少咗個人，呢個係邊個？咪係港澳辦主任張曉明，所以有傳佢因反送中已被燉冬菇！
料打壓更強硬
八方翻查資料，港澳工作協調小組組長係韓正，下面有4個副組長，分別係國務委員楊潔篪、中央統戰部部長尤權、外長王毅同小明。睇返當日官方新華社發稿話，「韓正、丁薛祥、楊潔篪、尤權、王毅、趙克志等參加了會見」，即係除小明之外，協調小組正、副組長都到齊，該政圈好事之徒同八方講，一直有傳小明要為反送中謊報軍情、欺上瞞下問責，只係見佢之前仲去深圳座談會，以為佢時辰未到，但𠵱家咁睇，小明大有可能已被搣柴，冇得做港澳工作協調小組副組長，由趙克志呢個公安部長取代，至於佢港澳辦主任個位，怕且都係等時間被調走，但政圈好事之徒話咪以為小明燉冬菇一定係好事，換個公安部長做副組長，可能更加強硬。