呢期全港最有資格感嘆生不逢時的人，不會不是倒霉的暗角七警，想當年，他們只不過係咁意拉個人埋牆邊打鑊甘，居然就被控告濫權施暴，入罪後雖然負責把風的二人上訴得直，另外落手落腳的五個卻要淺嚐鐵窗風味，踎監踎個一年半載，陰功豬啊，難怪撐警大會台上台下齊聲問候老母，梁振英時代做差佬直頭搵笨。古語有云小不忍則亂大謀，唔使點讀過書都一定耳熟能詳，如果那天他們比較克制，等到今時今日才打開潘朵拉盒子就一帆風順了，不但性格中㩒住㩒住的爛仔部份可以悉數解放，日日打人打到血流成河都不會問罪，珍惜一雙嬌貴玉手怕整損撞瘀，還有大量武器可以代勞，催淚彈胡椒噴霧水砲車任君選擇，警棍甚至有方便隨身攜帶的伸縮版，收工後興起，攞出嚟對鏡亂舞做名副其實的「舞警」又得，通街通巷蝦手無寸鐵的少女和細路又得，傳說中的退一步海闊天空，絕對冇花冇假。一時衝動失卻光明正大榮登魔界機緣，你話幾唔抵，諗諗都戥佢哋肉赤。
更令人振奮的，是正式錄用的警察不必再孤軍作戰，內有無號數速龍和帶廣州口音防暴兄弟左右扶持，外有來自五湖四海手足鼎力助陣，只要計準進退時間，包保事半功倍合作愉快。譬如元朗藤條軍恐襲，必須遲三十九分鐘抵埗，炮台山藍衣摺凳黨出動，要築成人牆全程保護，北角白衫刀手發威，圓盾不妨借給他作掩面之用，總之《三國演義》精彩折子戲輪流登場，一時演《空城計》，一時演《捉放曹》，大鑼大鼓為壓軸的《將相和》造勢。