HiFi碟歌后歌莉雅（Gloria）一直以來追逐歌手夢，大學畢業後以獨立唱作人自資出碟，之後做和音、為電影及廣告配樂等，她自言生命因為音樂變得精采。她是鄭秀文（Sammi）的御用和音，原來她第一次參加歌唱比賽奪冠，評判就是Sammi。
撰文︰祖李
攝影︰林德雄
場地提供︰工創空間
緣份就是這樣玄妙，二十多年前Sammi將獎項交到小女孩Gloria手中，小女孩長大後成為歌手，與昔日伯樂在台上作音樂交流，Gloria說：「Sammi畀咗第一名我，𠵱家輪到我可以為佢唱和音，世界真係細。」
「現場嘅愛好多」
Gloria在2005年被唱片監製徐日勤賞識，接了第一個演唱會騷︰「第一次係幫葉蒨文唱和音，仲要去美國走埠。Sammi我都唱咗四個騷，超過十年嘅合作關係。最深刻係2016年演唱會佢失聲，我哋和音發揮咗最大小宇宙，谷自己去到一個平時唔會到達嘅層次，最感動觀眾同佢大合唱，現場嘅愛多到不得了，係一個奇蹟，令我全身毛管戙。」
2013年，Gloria與黃貫中（Paul）參加《我是歌手第一季》，也是她演唱生涯難得的經驗︰「之前幫家強、阿Paul彈琴同和音，但咁耐以嚟都冇唱過《海闊天空》，嗰次係第一次唱，咁大個女同原唱者同台唱，比賽要自彈自唱兼一take過，我壓力大到癲。做和音講經驗，有次為王傑新加坡開騷，首歌係我開口唱先，但控制台哥哥唔記得推個掣，結果我嗰part唱到一半至有聲。以後每次唱先，我會先講嘢，避開呢啲蝦碌。」
6歲開始學琴
Gloria的母親是音樂教師，她6歲開始學琴，8歲參加比賽，十幾歲就想做創作歌手，用音樂與人溝通。她在浸大金融系畢業後，任職機械工程公司，但因為對音樂狂熱，寧願放棄穩定職業，奮鬥了五年，才實現全職音樂人的夢想。
下月Gloria將舉行演唱會，找來雷有輝做嘉賓，並首次製作現場專輯︰「會錄低現場觀眾嘅聲，我好期待。」今次演唱會主題是「gloriAlive」，活着意味很濃，近日政局動盪，有歌手將演唱會押後，但Gloria卻不以為意︰「我焦點放喺演唱會質素上，個場唔大，坐唔滿都唔會核突。」