近排藍絲愛國團禍港，同7.21元朗恐襲千絲萬縷嘅何君堯，意外被發現係幕後黑手之一，一眾巴絲就搵到機會清潔香港啦！因為何君堯有份做馬主嘅賽駒天祿，星期三夜馬會出戰第一場長康讓賽，呢隻來自告東尼馬房馬匹，上賽季出戰六次贏到兩冠一亞，睇往績有一定勝算，所以網民已經約定拉隊入場，表面係見證何君堯拉頭馬，實情係到時攞景加贈興。
罕有安排頭場舉行
其實馬會編何君堯隻馬賽事喺第一場都有啲奇，因馬場一向有不成文規則，就係低班賽通常編排於較早場次，相反高班賽事多會安排於較後場次舉行，因為「好戲在後頭」，但星期三夜馬八場賽事，只得一場係第二班賽，正常情況下應該編排於較後場次上演，但馬會罕有排頭場，唔少馬迷都嘖嘖稱奇，有網民更認為，係同近日「反送中」出位主角何君堯有關，等何君堯早來早走，以免有不愉快事件。馬會回應係按照一貫做法，因應每個賽馬日的情況作出所需安排，以確保賽事順利進行。
其實網民呢三個月去過機場、商場、球場，但就仲未入過馬場，如果聽晚真係集結跑馬地，POPO恐怕會如臨大敵，入場前對馬迷無差別查證搜身不在話下，仲隨時搵埋防暴隊進駐，但就會搞到馬迷冇晒癮，影響投注額囉！跑馬地區一直冇受示威活動直接影響，街坊更加未食過TG，唔知何君堯嘅威力會唔會令呢區開齋呢？但八方就要再三提班警察，場內出賽馬匹隻隻身價百萬計，亂放TG除咗肯定對馬匹不人道，馬主們仲隨時會追究到底！
李八方