6月9日一百萬人上街之後，至今特區政府企硬，好遲好遲（9月4日）先至肯講兩個字「撤回」，於是反送中條例人士唔收貨，觸發連場衝擊，警方一於讓子彈飛（催淚彈、布袋彈），令香港名揚世界，連權威科學雜誌《自然》，都及時發表咗一篇論催淚彈嘅文章，詳述催淚彈之不良影響。
不過對外國遊客影響最大嘅，還是示威人士塞機場，令遊客狼狽不堪，成為國際大新聞。唔講內地遊客有紀律地不來香港嘞，其他各地遊客亦暫停來港，國泰航空宣佈8月份客運數字，來港乘客大減，可知短期趨勢。於是乎迪士尼樂園、海洋公園、大小酒店無不蝕到喊，餐飲業專做內地人生意嘅例如餐飲R旗下餐廳，蝕到老闆面青，零售店舖當然唔好得去邊。
旅遊餐飲零售屬低增值行業，但能提供大量就業職位，加埋起嚟，佔GDP份額不大，佔GDP大份額者乃金融業。睇股市金融市場，林鄭一聲話撤回啫，恒指立即上升千幾點，回復正常，顯示政府充份掌握主動權，如肯聽李嘉誠之言，對香港未來主人翁「網開一面」嘅話，恒指衝上二萬九千點都似。目前青年人冇嘢可輸，皆因全屬無產階級，佢哋不怕攬炒，反而政府要顧及經濟，要為支持佢嘅建制派富豪及民建聯中產着想，搞攬炒就害人害己，林鄭要攬炒，話咁易，淨係堅決要求警暴或鎮壓，決不對餘下四大訴求讓步，激發更多示威，已經係攬炒成功，如果再進一步引用「緊急法」，全港一鑊熟，香港難逃玉石俱焚之局。林鄭是基督還是撒旦，在乎佢一念之間，又或者係在乎習大大一念之間。要推冧香港經濟，香港保皇派無此本事，唯習大大有此功力。
最近進入「收成期」嘅朋友擔心樓市大跌，左丁山反為冇咁驚（除非香港實施緊急法），在目前基本因素下，美國總統特朗普要強迫聯儲局減息，歐洲央行要重新量寬，中國連番降準，即是話，各地利率走向，易跌難升，好有機會全世界都走入負利率世界，我哋存款在銀行不只冇息收，而且要付費用，日本人早已時興買夾萬返屋企收藏現金，此風氣不難傳染全世界，香港好難會加息咯！過往香港財爺及金管局一齊講本港進入加息周期，已證明係得個講字。在利率極低甚至負利率情況下，唔向銀行借錢就笨。目前香港樓按供樓利率已低於通脹率（3.3％），供樓人士好着數，專業人士節衣縮食都儲不到首期，故此媽叉金管局（嚴限五成借款）媽到飛起，但對於已有樓在手之投資者或自住人家，持有成本（Holding cost）低到無可再低，降價求售都幾笨，除非自己周轉不靈啦！一啲大行分析師認為樓價會跌三成，係悲觀啲嘅，唔好信！