阮民安（Tommy）斥資六位數和KOL老婆Eva做潮牌時裝生意，籌備了兩年的Pop up store前晚在東京開店，當日一早他便到店中打點佈置。Tommy和老婆邀請了日本攝影大師米原康正夫婦到來，Eva換上店中新裝做生招牌，Tommy穿上黃色風褸配黑褲，貫徹撐「黃」，連月力撐反送中運動的Tommy，店中當眼的模特兒公仔，更戴上搶眼的粉紅色眼罩和豬嘴做配襯，兩件抗爭裝備變成fashion。
下月去台灣
身在東京，心在港的Tommy昨日接受電話訪問時說：「其實呢個構思都係想講堅持到尾，唔好放棄，最後都一定會做到嘢，我哋佈置新店時，一路諗點樣可以將一啲抗爭嘅元素擺喺今次嘅Pop up store入面。於是Eva同另一個partner就諗到將其中一個model公仔戴住一個DIY粉紅色眼罩同粉紅色豬嘴，下身着番Eva今次collection嘅衫，變成今次嘅打卡位，去對應香港努力緊抗爭嘅手足，兄弟爬山，各有各做，希望佢哋感受到我哋喺東京畀佢哋嘅support。」Tommy直指眼罩和豬嘴已變成fashion：「係呀，至於有冇得賣，咁睇吓大家鍾唔鍾意啦，如果鍾意，我哋會考慮喺下一站Pop up store推出，我哋下一站10月會去台灣，之後11月會去LA。」
全部人感動
Tommy表示這次東京Pop up store籌備了差唔多兩年，終於排除萬難成事，他說：「一個新品牌要喺東京搞Pop up真係唔容易，今次仲要喺Laforet入面嘅舖頭度搞，仲更加難，雖然過程有好多大大小小嘅問題出現，但我同Eva同埋團隊都冇因為咁就放棄，最後終於可以成功喺東京將我哋嘅心血放上架，我哋全部人都好感動！」
採訪：劉敏