巴黎聖日耳門（PSG）上星期六喺法甲主場迎戰斯特拉斯堡，返唔成巴塞隆拿嘅尼馬，今季首度幫球隊披甲上陣，雖然佢不斷俾球迷噓，但PSG最後都要靠佢喺補時嘅倒掛入波絕殺，以1:0險勝斯特拉斯堡拎到3連勝。
尼馬終於首度正選兼踢足全場，PSG球迷因不滿尼馬想離隊，喺現場介紹陣容嗰陣已經對尼馬報以噓聲，佢喺拎波嗰陣亦被喝倒采。不過，尼馬喺補時接應艾度迪亞路嘅傳中球倒掛入網，幫PSG以1:0絕殺斯特拉斯堡，贏得一啲球迷嘅喝采聲。
尼馬賽後坦言︰「我唔係第一次俾人噓。好遺憾，但我知道由𠵱家開始，我踢嘅每場主場都會變成客場。」尼馬仲話，自己喺轉會窗關閉後就專注番喺PSG，而想離隊係私人理由︰「我表明咗我冇針對PSG球迷，都冇針對作為球會嘅PSG，每個人都知道我想走，我唔會透露詳細發生咗啲乜。家陣係時候翻另一頁，今日我係PSG嘅球員，而我喺球場上將會全力以赴。」